ਡਵੀਜ਼ਨਲ ਕਮਿਸ਼ਨਰ ਵਲੋਂ ਹਰਿਆਣਾ ’ਚ ਗੋਲਡਨ ਸੰਧਰ ਸ਼ੂਗਰ ਮਿੱਲ ਦੀ 155 ਏਕੜ ਜ਼ਮੀਨ ਦੀ ਅਸਲ ਸਥਿਤੀ ਦਾ ਪਤਾ ਲਗਾਉਣ ਲਈ ਕਮੇਟੀ ਦਾ ਗਠਨ

ਕਮੇਟੀ ’ਚ ਪੰਜ ਸਰਕਾਰੀ ਅਤੇ 4 ਕਿਸਾਨ ਯੂਨੀਅਨਾਂ ਦੇ ਨੁਮਾਇੰਦੇ ਸ਼ਾਮਿਲ, ਕਮੇਟੀ ਵਲੋਂ 13 ਜੂਨ ਨੂੰ ਦੌਰਾ ਕਰਨ ਤੋਂ ਬਾਅਦ ਤੁਰੰਤ ਰਿਪੋਰਟ ਸੌਂਪੀ ਜਾਵੇਗੀ

5 Dariya News

ਕਪੂਰਥਲਾ 10-Jun-2022

ਜਲੰਧਰ ਡਵੀਜ਼ਨਲ ਕਮਿਸ਼ਨਰ ਸ੍ਰੀਮਤੀ ਗੁਰਪ੍ਰੀਤ ਕੌਰ ਸਪਰਾ ਵਲੋਂ ਫਤਿਆਬਾਦ (ਹਰਿਆਣਾ) ਵਿੱਚ ਗੋਲਡਨ ਸੰਧਰ ਸ਼ੂਗਰ ਮਿੱਲ ਨਾਲ ਸਬੰਧਿਤ 155 ਏਕੜ ਜ਼ਮੀਨ ਦੀ ਅਸਲ ਸਥਿਤੀ ਅਤੇ ਇਸ ਦੀ ਕੀਮਤ ਅਤੇ ਪੜਤਾਲ ਕਰਨ ਲਈ ਕਮੇਟੀ ਦਾ ਗਠਨ ਕੀਤਾ ਗਿਆ ਤਾਂ ਜੋ ਮਿੱਲ ਵਲੋਂ ਕਿਸਾਨਾਂ ਦੀ ਬਕਾਇਆ ਰਾਸ਼ੀ ਦੀ ਅਦਾਇਗੀ ਨੂੰ ਕਰਵਾਇਆ ਜਾ ਸਕੇ।

ਕਿਸਾਨ ਯੂਨੀਅਨਾਂ ਦੇ ਨੁਮਾਇੰਦਿਆਂ ਦੀ ਮੀਟਿੰਗ ਜਿਸ ਵਿੱਚ ਡਿਪਟੀ ਕਮਿਸ਼ਨਰ ਵਿਸ਼ੇਸ਼ ਸਾਰੰਗਲ, ਸ਼ੂਗਰ ਫੈਡ ਦੇ ਨੁਮਾਇੰਦਿਆਂ ਅਤੇ ਕੇਨ ਕਮਿਸ਼ਨਰ, ਟੈਕਟੇਸ਼ਨ ਵਿਭਾਗ ਦੇ ਅਧਿਕਾਰੀਆਂ ਵਲੋਂ ਪ੍ਰਸ਼ਾਸਨਿਕ ਅਤੇ ਸੂਬੇ ਦੇ ਕਿਸਾਨਾਂ ਦੇ ਵਿੱਤੀ ਹਿੱਤ ਨੂੰ ਦੇਖਦਿਆਂ ਇਹ ਫ਼ੈਸਲਾ ਲਿਆ ਗਿਆ ਕਿ ਫਤਿਆਬਾਦ (ਹਰਿਆਣਾ) ਵਿੱਚ 155 ਏਕੜ ਜ਼ਮੀਨ ਦੀ ਅਸਲ ਸਥਿਤੀ, ਇਸ ਦੇ ਮਾਲਕ ਵਲੋਂ ਹੋਰਨਾਂ ਨੂੰ ਦਿੱਤੀਆਂ ਜਾਣ ਵਾਲੀਆਂ ਦੇਣਦਾਰੀਆਂ ਦਾ ਪਤਾ ਲਗਾਇਆ ਜਾਵੇਗਾ।

ਕਮੇਟੀ ਵਲੋਂ ਜ਼ਿਲ੍ਹਾ ਫਤਿਆਬਾਦ ਵਿੱਚ ਸਬੰਧਿਤ ਸਥਾਨ ਦਾ 13 ਜੂਨ 2022 ਨੂੰ ਦੌਰਾ ਕਰਕੇ ਇਸ ਦੇ ਸਾਰੇ ਪਹਿਲੂ ਜਿਸ ਵਿੱਚ ਬਜ਼ਾਰੀ ਕੀਮਤ ਅਤੇ ਇਸ ’ਤੇ ਰਹਿੰਦੇ ਬਕਾਇਆਂ ਬਾਰੇ ਪੜਤਾਲ ਕੀਤੀ ਜਾਵੇਗੀ।ਜ਼ਿਕਰਯੋਗ ਹੈ ਕਿ ਗੋਲਡਨ ਸੰਧਰ ਸ਼ੂਗਰ ਮਿੱਲ ਫਗਵਾੜਾ ਵਲੋਂ ਕਿਸਾਨਾਂ ਪਾਸੋਂ ਖ਼ਰੀਦੇ ਗਏ ਗੰਨੇ ਦਾ 72 ਕਰੋੜ ਰੁਪਏ ਅਦਾ ਕੀਤਾ ਜਾਣਾ ਹੈ।

ਕਮੇਟ ਵਿੱਚ ਕੁਲਪ੍ਰੀਤ ਸਿੰਘ ਐਸ.ਡੀ.ਐਮ.ਅਜਨਾਲਾ, ਪਵਨ ਕੁਮਾਰ, ਨਾਇਬ ਤਹਿਸੀਲਦਾਰ ਐਸ.ਬੀ.ਐਸ. ਨਗਰ, ਨਵਦੀਪ ਸਿੰਘ ਭੋਗਲ, ਤਹਿਸੀਲਦਾਰ ਫਗਵਾੜਾ, ਸੁਰਿੰਦਰ ਪਾਲ ਸਿੰਘ ਕਾਨੂੰਨਗੋ ਫਗਵਾੜਾ ਅਤੇ ਜਸਪਿੰਦਰ ਸਿੰਘ ਪਟਵਾਰੀ ਫਗਵਾੜਾ ਨੂੰ ਸ਼ਾਮਿਲ ਕੀਤਾ ਗਿਆ। ਇਸ ਤੋਂ ਇਲਾਵਾ ਕਮੇਟੀ ਵਿੱਚ ਕਿਸਾਨ ਯੂਨੀਅਨਾਂ ਦੇ ਨੁਮਾਇੰਦੇ ਜਿਨਾਂ ਦੇ ਨਾਮ ਕਿਸਾਨ ਯੂਨੀਅਨਾਂ ਵਲੋਂ ਡਿਪਟੀ ਕਮਿਸ਼ਨਰ ਨੂੰ ਮੁਹੱਈਆ ਕਰਵਾਏ ਜਾਣਗੇ ਨੂੰ ਸ਼ਾਮਿਲ ਕੀਤਾ ਗਿਆ ਹੈ।           

ਤਾਇਨਾਤ ਕੀਤੇ ਗਏ ਅਧਿਕਾਰੀ ਜ਼ਿਲ੍ਹਾ ਫਤਿਆਬਾਦ ਦੀ ਸਬ ਤਹਿਸੀਲ ਭੂਨਾ ਦੇ ਮਾਲ ਵਿਭਾਗ ਦੇ ਅਧਿਕਾਰੀਆਂ ਨਾਲ ਸੰਪਰਕ ਵਿੱਚ ਰਹਿਣਗੇ ਤੇ ਜ਼ਮੀਨ ਦੀ ਪਿਛਲੇ ਸਮੇਂ ਹੋਈ ਖ਼ਰੀਦੋ-ਫਰੋਖ਼ਤ ਅਤੇ ਬਜਾਰੀ ਕੀਮਤ ਸਬੰਧੀ ਮਾਲ ਰਿਕਾਰਡ ਦੀ ਜਾਂਚ ਕੀਤੀ ਜਾਵੇਗੀ। ਕਮੇਟੀ ਨੂੰ ਕਿਹਾ ਗਿਆ ਹੈ ਕਿ ਇਸ ਸਬੰਧੀ ਦੌਰਾ ਕਰਨ ਉਪਰੰਤ ਤੁਰੰਤ ਆਪਣੀ ਰਿਪੋਰਟ ਪੇਸ਼ ਕੀਤੀ ਜਾਵੇ।

ਇਸ ਮੌਕੇ ਕਸ਼ਮੀਰ ਸਿੰਘ ਡਾਇਰੈਕਟਰ ਸ਼ੂਗਰ ਮਿਲ, ਏ.ਡੀ.ਸ਼ੀ. (ਜਨਰਲ) ਅਜੈ ਅਰੋੜਾ, ਏ.ਡੀ.ਸੀ. ਫਗਵਾੜਾ  ਡਾ.ਨਯਨ ਜੱਸਲ, ਸਹਾਇਕ ਕਮਿਸ਼ਨਰ ਰਣਜੀਤ ਸਿੰਘ, ਭਾਰਤੀ ਕਿਸਾਨ ਯੂਨੀਅਨ ਦੋਆਬਾ ਤੋਂ ਕ੍ਰਿਪਾਲ ਸਿੰਘ, ਮੇਜਰ ਸਿੰਘ, ਤਰਸੇਮ ਸਿੰਘ ਸਹਾਰੇ ਕਿਸਾਨ ਨੁਮਾਇੰਦੇ ਤੋਂ ਇਲਾਵਾ ਦੋਆਬਾ ਕਿਸਾਨ ਸੰਘਰਸ਼ ਕਮੇਟੀ ਤੋਂ ਬਲਵਿੰਦਰ ਸਿੰਘ ਆਦਿ ਹਾਜ਼ਰ ਸਨ।