ਇਕ ਕੁਇੰਟਲ ਭੂਕੀ ਸਣੇ 1 ਵਿਅਕਤੀ ਕਾਬੂ
5 ਦਰਿਆ ਨਿਊਜ਼ (ਅਸ਼ਵਨੀ ਸ਼ਰਮਾ)
ਗੜ੍ਹਸ਼ੰਕਰ 10-Apr-2014
ਸਥਾਨਕ ਪੁਲਿਸ ਨੇ ਸੁਸ਼ੀਲ ਕੁਮਾਰ ਸੀਨੀਅਰ ਪੁਲਿਸ ਕਪਤਾਨ ਹੁਸ਼ਿਆਰਪੁਰ ਵਲੋਂ ਨਸ਼ਾ ਵਿਰੋਧੀ ਅਨਸਰਾਂ ਖ਼ਿਲਾਫ਼ ਚਲਾਉ ਮੁਹਿੰਮ ਤਹਿਤ ਸ੍ਰੀ ਮਨਜੀਤ ਸਿੰਘ ਉਪ ਪੁਲਿਸ ਕਪਤਾਨ ਗੜ੍ਹਸ਼ੰਕਰ ਦੀ ਅਗਵਾਈ ਹੇਠ ਜੀਪ ਵਿਚੋਂ ਇਕ ਵਿਅਕਤੀ ਨੂੰ ਇਕ ਕੁਇੰਟਲ ਪੰਜ ਕਿਲੋ ਚੂਰਾ ਪੋਸਤ ਸਮੇਤ ਕਾਬੂ ਕਰਨ 'ਚ ਸਫਲਤਾ ਹਾਸਿਲ ਕੀਤੀ ਹੈ ਜਦਕਿ ਇਸ ਦੌਰਾਨ ਜੀਪ ਚਾਲਕ ਫਰਾਰ ਹੋਣ ਵਿਚ ਸਫਲ ਹੋ ਗਿਆ। ਇੰਸਪੈਕਟਰ ਕੁਲਦੀਪ ਸਿੰਘ ਮੁੱਖ ਅਫਸਰ ਥਾਣਾ ਗੜ੍ਹਸ਼ੰਕਰ ਦੀ ਅਗਵਾਈ ਹੇਠ ਸਟੈਟਿਕ ਟੀਮ ਵਲੋਂ ਮੇਜਰ ਗੁਰਜਿੰਦਰ ਸਿੰਘ ਬੈਨੀਪਾਲ ਤਹਿਸੀਲਦਾਰ ਦੀ ਹਾਜ਼ਰੀ ਵਿਚ ਪੁਲਿਸ ਨੇ ਨਾਕਾਬੰਦੀ ਦੌਰਾਨ ਪੁਲ ਨਹਿਰ ਰਾਮਪੁਰ ਬਿਲੜੋਂ ਵਿਖੇ ਪਿੰਡ ਗੱਜਰ ਸਾਈਡ ਵਲੋਂ ਆਉਂਦੀ ਇਕ ਮਹਿੰਦਰਾ ਜੀਪ ਨੂੰ ਟਾਰਚ ਰਾਹੀਂ ਰੁਕਣ ਦਾ ਇਸ਼ਾਰਾ ਕੀਤਾ ਤੇ ਜੀਪ ਚਾਲਕ ਨੇ ਨਾਕੇ ਤੋਂ ਕਰੀਬ 10 ਕਰਮ ਪਿੱਛੇ ਹੀ ਜੀਪ ਰੋਕ ਲਈ ਤੋਂ ਉਹ ਹਨੇਰੇ ਦਾ ਫਾਇਦਾ ਉਠਾ ਕੇ ਫਰਾਰ ਹੋਣ ਵਿਚ ਸਫਲ ਹੋ ਗਿਆ। ਪੁਲਿਸ ਵਲੋਂ ਜੀਪ ਵਿਚ ਚਾਲਕ ਦੇ ਨਾਲ ਵਾਲੀ ਸੀਟ ਤੇ ਬੈਠੇ ਵਿਅਕਤੀ ਸ਼ਿੰਗਾਰਾ ਸਿੰਘ ਪੁੱਤਰ ਪ੍ਰੀਤਮ ਸਿੰਘ ਵਾਸੀ ਰਾਮਪੁਰ ਨੂੰ ਕਾਬੂ ਕਰ ਲਿਆ ਜਿਸ ਦੇ ਪੈਰਾਂ ਵਿਚ ਰੱਖੇ ਪਲਾਸਟਿਕ ਦੇ ਬੋਰੇ ਵਿਚੋਂ ਅਤੇ ਜੀਪ ਦੇ ਪਿਛਲੀ ਸੀਟ ਦੇ ਲਾਗੇ ਪਏ ਦੋ ਪਲਾਸਟਿਕ ਦੇ ਬੋਰਿਆਂ ਵਿਚੋਂ ਕੁੱਲ ਇਕ ਕੁਇੰਟਲ ਪੰਜ ਕਿਲੋ ਡੋਡੇ (ਚੂਰਾ ਪੋਸਤ) ਬਰਾਮਦ ਕਰ ਲਿਆ। ਪੁਲਿਸ ਵਲੋਂ ਸ਼ਿੰਗਾਰਾ ਸਿੰਘ ਸਮੇਤ ਮਫ਼ਰੂਰ ਹੋਏ ਵਿਅਕਤੀ ਸਤਨਾਮ ਸਿੰਘ ਵਾਸੀ ਰਾਮਪੁਰ ਦੇ ਖ਼ਿਲਾਫ਼ 15-61-85 ਐਨਡੀਪੀਐਸ ਐਕਟ ਤਹਿਤ ਮਾਮਲਾ ਦਰਜ਼ ਕਰਕੇ ਸਤਨਾਮ ਸਿੰਘ ਦੀ ਭਾਲ ਕੀਤੀ ਜਾ ਰਹੀ ਹੈ।