ਸਿਹਤ ਮੰਤਰੀ ਦੇ ਹਲਕੇ ਦੇ ਹਸਪਤਾਲ ਪੰਜ ਸਾਲ ਰਹੇ ਬਿਮਾਰ, ਲੋਕ ਇਲਾਜ ਲਈ ਗਏ ਚੰਡੀਗੜ੍ਹ : ਸੰਜੀਵ ਵਸ਼ਿਸ਼ਟ

ਭਾਜਪਾ ਸਰਕਾਰ ਵਿਚ ਮੋਹਾਲੀ ਸ਼ਹਿਰ ਨੂੰ ਮੈਡੀਕਲ ਹੱਬ ਬਣਾਇਆ ਜਾਵੇਗਾ, ਹਰ ਬਿਮਾਰੀ ਦਾ ਹੋਵੇਗਾ ਇਲਾਜ - ਸੰਜੀਵ ਵਸ਼ਿਸ਼ਟ

5 Dariya News

ਮੋਹਾਲੀ 12-Feb-2022

ਮੋਹਾਲੀ ਹਲਕੇ ਦਾ ਵਿਧਾਇਕ ਸਿਹਤ ਮੰਤਰੀ ਰਿਹਾ ਹੋਵੇ ਪਰ ਹਲਕੇ ਦੇ ਲੋਕਾਂ ਨੂੰ ਇਲਾਜ ਲਈ ਪ੍ਰਾਈਵੇਟ ਹਸਪਤਾਲਾਂ ਜਾਂ ਚੰਡੀਗੜ੍ਹ ਦੇ ਹਸਪਤਾਲਾਂ ਤੇ ਨਿਰਭਰ ਰਹਿਣਾ ਪਵੇ। ਇਸ ਦਾ ਮਤਲਬ ਹੈ ਕਿ ਸਿਹਤ ਮੰਤਰੀ ਦੇ ਆਪਣੇ ਹਲਕੇ ਦੇ ਸਭ ਹਸਪਤਾਲ ਪੰਜ ਸਾਲ ਬਿਮਾਰ ਹੀ ਰਹੇ। ਮੋਹਾਲੀ ਦੇ ਪੜੇ ਲਿਖੇ ਵਸਨੀਕ ਵੀ ਇਸ ਗੱਲ ਨੂੰ ਚੰਗੀ ਤਰਾਂ ਸਮਝ ਚੁੱਕੇ ਹਨ ਕਿ ਜਿਸ ਵਿਸ਼ਵਾਸ ਨਾਲ ਉਨ੍ਹਾਂ ਆਪਣੀਆਂ ਵੋਟਾਂ ਕਾਂਗਰਸੀ ਉਮੀਦਵਾਰ ਨੂੰ ਪਾਈਆਂ ਸਨ, ਉਨ੍ਹਾਂ ਨਾਲ ਵਿਸ਼ਵਾਸ-ਘਾਤ ਹੋਇਆ ਹੈ। ਇਨ੍ਹਾਂ ਗੱਲਾਂ ਦਾ ਪ੍ਰਗਟਾਵਾ ਮੋਹਾਲੀ ਹਲਕੇ ਦੇ ਭਾਜਪਾ ਉਮੀਦਵਾਰ ਸੰਜੀਵ ਵਸ਼ਿਸ਼ਟ ਵੱਲੋਂ ਫ਼ੇਜ਼ ਇਕ ਅਤੇ ਫ਼ੇਜ਼ ਚਾਰ ਵਿਚ ਚੋਣ ਮੀਟਿੰਗਾਂ ਦੌਰਾਨ ਕੀਤਾ ਗਿਆ । ਇਸ ਦੇ ਨਾਲ ਹੀ ਸੰਜੀਵ ਵਸ਼ਿਸ਼ਟ ਨੇ ਫ਼ੇਜ਼ ਇਕ ਅਤੇ ਚਾਰ ਵਿਚ ਡੋਰ ਟੂ ਡੋਰ ਚੋਣ ਪ੍ਰਚਾਰ ਵੀ ਕੀਤਾ। ਵਸ਼ਿਸ਼ਟ ਨੇ ਕਿਹਾ ਕਿ ਕੌੜੀ ਸਚਾਈ ਇਹ ਹੈ ਕਿ ਅੱਜ ਵੀ ਮੋਹਾਲੀ ਦੇ ਵਸਨੀਕ ਆਪਣੇ ਇਲਾਜ ਲਈ ਸਿਵਲ ਹਸਪਤਾਲ ਮੋਹਾਲੀ ਜਾਣ ਤੋਂ ਕਤਰਾਉਂਦੇ ਹਨ, ਕਿਉਂਕਿ ਥੋੜੀ ਜਿਹੀ ਐਮਰਜੈਂਸੀ ਹੋਣ ਤੇ ਮਰੀਜ਼ ਨੂੰ ਸਿੱਧਾ ਚੰਡੀਗੜ੍ਹ ਰੈਫ਼ਰ ਕਰ ਦਿਤਾ ਜਾਂਦਾ ਹੈ। ਇਸ ਦਾ ਕਾਰਨ ਸਿਵਲ ਹਸਪਤਾਲ ਵਿਚ ਸੁਵਿਧਾਵਾਂ ਦੀ ਕਮੀ ਹੋਣਾ ਹੈ। ਭਾਜਪਾ ਉਮੀਦਵਾਰ ਨੇ ਕਿਹਾ ਕਿ ਇਸ ਦੇ ਜ਼ਿੰਮੇਵਾਰ ਸਿੱਧੇ ਜ਼ਿੰਮੇਵਾਰ ਸਾਬਕਾ ਸਿਹਤ ਮੰਤਰੀ ਬਲਬੀਰ ਸਿੱਧੂ ਹਨ ਜਿਨ੍ਹਾਂ ਆਪਣੇ ਕਾਰਜ ਕਾਲ ਵਿਚ ਹਲਕੇ ਦੀ ਸਿਹਤ ਵਿਵਸਥਾ ਸੁਧਾਰਨ ਵੱਲ ਕੋਈ ਕਦਮ ਨਹੀਂ ਚੁੱਕੇ। ਬਲਕਿ ਆਪਣੇ ਕਾਰੋਬਾਰ ਚਮਕਾਉਣ ਅਤੇ ਪਿੰਡਾਂ ਦੀਆਂ ਸ਼ਾਮਲਾਟ ਜ਼ਮੀਨਾਂ ਤੇ ਕਬਜ਼ਾ ਕਰਨ ਵਿਚ ਰੁੱਝੇ ਰਹੇ। ਹੁਣ ਉਹ ਕਿਸ ਮੂੰਹ ਨਾਲ ਲੋਕਾਂ ਵਿਚ ਵੋਟਾਂ ਮੰਗਣ ਜਾ ਰਹੇ ਹਨ, ਜਦ ਕਿ ਲੋਕ ਹੁਣ ਸਿੱਧੂ ਨੂੰ ਕਦੀ ਮਾਫ਼ ਨਹੀਂ ਕਰਨਗੇ। ਕਰੋਨਾ ਕਾਲ ਵਿਚ ਸਿੱਧੂ ਨੇ ਲੋਕਾਂ ਦੀ ਮਦਦ ਕਰਨ ਦੀ ਬਜਾਏ ਘਰ ਦੇ ਬਾਹਰ ਨਾ ਮਿਲਣ ਦੀ ਤਖ਼ਤੀ ਲਟਕਾ ਛੱਡੀ । ਜਦ ਕਿ ਬਾਹਰ ਲੋਕ ਇਲਾਜ ਦੇ ਬਿਨਾਂ  ਮਰ ਰਹੇ ਸਨ।

ਸੰਜੀਵ ਵਸ਼ਿਸ਼ਟ ਨੇ ਕਿਹਾ ਕਿ ਉਹ ਵਾਅਦਾ ਕਰਦੇ ਹਨ ਕਿ ਭਾਜਪਾ ਸਰਕਾਰ ਆਉਣ ਤੇ  ਮੋਹਾਲੀ ਨੂੰ ਮੈਡੀਕਲ ਹੱਬ ਵਜੋਂ ਵਿਕਸਤ ਕਰਕੇ ਇੱਥੇ ਹਰ ਬਿਮਾਰੀ ਦੇ ਇਲਾਜ ਲਈ ਮੈਡੀਕਲ ਸੁਵਿਧਾਵਾਂ ਨੂੰ ਵਿਕਸਤ ਕੀਤਾ ਜਾਵੇਗਾ।  ਮੋਹਾਲੀ ਹਲਕੇ ਵਿਚ ਸੂਬੇ ਦਾ ਸਭ ਤੋਂ ਵੱਡਾ ਹਸਪਤਾਲ ਖੋਲਿਆਂ ਜਾਵੇਗਾ।ਜਿੱਥੇ ਹਰ ਬਿਮਾਰੀ ਦਾ ਇਲਾਜ ਅਤੇ ਹਰ ਤਰਾਂ ਦੇ ਟੈੱਸਟ ਮੁਫ਼ਤ ਕੀਤਾ ਜਾਵੇਗਾ। ਇਸ ਦੇ ਨਾਲ ਹੀ ਕੇਂਦਰੀ ਜਨ ਔਸ਼ਧੀ ਯੋਜਨਾ ਨੂੰ ਜ਼ਮੀਨੀ ਪੱਧਰ ਤੇ ਲਾਗੂ ਕਰਦੇ ਹੋਏ ਦਵਾਈਆਂ ਵੀ ਮੁਫ਼ਤ ਦਿੱਤੀਆਂ ਜਾਣਗੀਆਂ।ਮੋਹਾਲੀ ਦੇ ਮੌਜੂਦਾ ਹਸਪਤਾਲਾਂ ਅਤੇ ਡਿਸਪੈਂਸਰੀਆਂ ਨੂੰ ਪ੍ਰਾਈਵੇਟ ਹਸਪਤਾਲਾਂ ਵਾਂਗ ਹੀ ਅਪਗ੍ਰੇਡ ਕਰਦੇ ਹੋਏ ਆਧੁਨਿਕ ਮਸ਼ੀਨਰੀ ਦਾ ਇੰਤਜ਼ਾਮ ਕੀਤਾ ਜਾਵੇਗਾ। ਵਸ਼ਿਸ਼ਟ ਨੇ ਕਿਹਾ ਕਿ ਹਲਕੇ ਦੇ ਪਿੰਡਾਂ ਵਿਚ ਵੀ ਡਿਸਪੈਂਸਰੀਆਂ ਨੂੰ ਹਰ ਇਲਾਜ ਲਈ ਸ਼ਹਿਰੀ ਵੱਡੇ ਹਸਪਤਾਲਾਂ ਜੋੜਦੇ ਹੋਏ ਅੱਪਡੇਟ ਕੀਤਾ ਜਾਵੇਗਾ । ਉਨ੍ਹਾਂ ਡਿਸਪੈਂਸਰੀਆਂ ਵਿਚ ਹੀ ਹਰ ਤਰਾਂ ਦੇ ਟੈੱਸਟ ਲਈ ਲੈਬਾਰਟਰੀਆਂ ਖੋਲੀਆਂ ਜਾਣਗੀਆਂ। ਵਸ਼ਿਸ਼ਟ ਨੇ ਕਿਹਾ ਕਿ ਉਨ੍ਹਾਂ ਹਸਪਤਾਲਾਂ ਅਤੇ ਡਿਸਪੈਂਸਰੀਆਂ ਵਿਚ ਚੌਵੀ ਘੰਟੇ ਮੈਡੀਕਲ ਸਟਾਫ਼ ਦੀ ਉਪਲਬਧਤਾ ਯਕੀਨੀ ਬਣਾਇਆਂ ਜਾਵੇਗਾ। ਤਾਂ ਕਿ ਕੋਈ ਵੀ ਨਾਗਰਿਕ ਆਪਣੇ ਇਲਾਜ ਲਈ ਚੰਡੀਗੜ੍ਹ ਦੇ ਹਸਪਤਾਲਾਂ ਤੇ ਨਿਰਭਰ ਨਾ ਰਹੇ। ਸੰਜੀਵ ਵਸ਼ਿਸ਼ਟ ਨੇ ਹਲਕੇ ਵਿਚ ਐਂਬੂਲੈਂਸ ਦੀ ਸੇਵਾ ਵਿਚ ਵੀ ਸੁਧਾਰ ਕਰਦੇ ਹੋਏ ਮਿਥੇ ਥਾਂ ਤੇ ਪੰਦਰਾਂ ਮਿੰਟ ਵਿਚ ਪਹੁੰਚਣਾ ਯਕੀਨੀ ਬਣਾਉਣ ਦੀ ਗੱਲ ਕਹੀ ।ਇਸ ਤੋਂ ਬਾਅਦ ਇੰਡਸਟਰੀਅਲ ਏਰੀਆ ਫ਼ੇਜ਼ ਅੱਠ ਵਿਚ ਸੰਜੀਵ ਵਸ਼ਿਸ਼ਟ ਨੇ ਉਦਯੋਗਿਕ ਕਾਮਿਆਂ ਨੂੰ ਸੰਬੋਧਿਤ ਕੀਤਾ। ਵਸ਼ਿਸ਼ਟ ਨੇ ਕਾਮਿਆਂ ਨੂੰ ਸੰਬੋਧਨ ਕਰਦੇ ਹੋਏ ਕਿਹਾ ਕਿ ਸਿਹਤ ਸੰਭਾਲ ਹਰ ਨਾਗਰਿਕ ਦੇ ਸਵਿੰਧਾਨਿਕ ਹੈ ।ਇਸ ਲਈ ਭਾਜਪਾ ਸਰਕਾਰ ਵਿਚ ਉਦਯੋਗਿਕ ਕਾਮਿਆਂ ਲਈ ਬਣੇ ਈ ਐੱਸ ਆਈ ਹਸਪਤਾਲ ਨੂੰ ਪੁਨਰ ਸੁਰਜੀਤ ਕਰਕੇ ਉਨ੍ਹਾਂ ਹਸਪਤਾਲਾਂ ਨੂੰ ਕਿਸੇ ਵੀ ਦੁਰਘਟਨਾ ਵਿਚ ਇਲਾਜ ਕਰਨ ਲਈ ਸਮਰੱਥ ਬਣਾਇਆ ਜਾਵੇਗਾ।ਉਨ੍ਹਾਂ ਭਾਜਪਾ ਸਰਕਾਰ ਵਿਚ ਹਰ ਉਦਯੋਗਿਕ ਕਾਮੇ ਲਈ ਪੰਜ ਲੱਖ ਦੀ ਮੈਡੀਕਲ ਸੁਵਿਧਾ ਉਪਲਬਧ ਕਰਾਉਣ ਦਾ ਵਾਅਦਾ ਕੀਤਾ। ਸੰਜੀਵ ਵਸ਼ਿਸ਼ਟ ਨੇ ਹਾਜ਼ਰ ਹਲਕਾ ਨਿਵਾਸੀਆਂ ਨੂੰ ਕਿਹਾ ਕਿ ਰੁਜ਼ਗਾਰ, ਸਿੱਖਿਆਂ ਅਤੇ ਸਿਹਤ ਉਨ੍ਹਾਂ ਦੀ ਚੋਣ ਮੁਹਿੰਮ  ਦੇ ਮੁੱਖ ਮੁੱਦੇ ਹਨ, ਜਿਨ੍ਹਾਂ ਨੂੰ ਉਹ ਸਰਕਾਰ ਬਣਨ ਦੇ ਨਾਲ ਪੂਰਾ ਕਰਨਗੇ।