ਵਿਕਾਸ ਦੇ ਦਾਅਵੇ ਕਰਨ ਵਾਲੇ ਸਿੱਧੂ ਨੂੰ ਵੋਟਰ ਪੁੱਛਣ ਕੀ ਨੀਂਹ ਪੱਥਰ ਰੱਖਣਾ ਹੀ ਵਿਕਾਸ ਹੁੰਦਾ ਹੈ : ਸੰਜੀਵ ਵਸ਼ਿਸ਼ਟ

ਪੰਜਾਬ ਦੇ ਲੋਕ ਮੌਕਾਪ੍ਰਸਤ ਅਤੇ ਮਤਲਬੀ ਆਮ ਆਦਮੀ ਪਾਰਟੀ ਦੇ ਲੋਕਾਂ ਨੂੰ ਕਦੇ ਵੀ ਬਰਦਾਸ਼ਤ ਨਹੀਂ ਕਰਨਗੇ- ਵਸ਼ਿਸ਼ਟ

5 Dariya News

ਮੋਹਾਲੀ 11-Feb-2022

ਜੇਕਰ ਸਿਰਫ਼ ਨੀਂਹ ਪੱਥਰ ਰੱਖਣ ਜਾਂ ਲੋਕਾਂ ਦੇ ਵਿਆਹ ਸ਼ਾਦੀਆਂ ਜਾਂ ਭੋਗਾਂ ਤੇ ਜਾ ਆਉਣ ਨਾਲ ਨੂੰ ਵਿਕਾਸ ਕਿਹਾ ਜਾਂਦਾ ਤਾਂ ਇਸ ਨੂੰ ਮੋਹਾਲੀ ਦਾ ਵਿਕਾਸ ਕਿਹਾ ਜਾਂਦਾ । ਪਰ ਅਸਲੀ ਹਲਕੇ ਦਾ ਅਸਲੀ ਵਿਕਾਸ ਜ਼ਮੀਨੀ ਪੱਧਰ ਤੇ ਵਿਖਾਈ ਦੇਣਾ ਚਾਹੀਦਾ ਹੈ। ਅੱਜ ਮੋਹਾਲੀ ਵਿਚ ਹਰ ਥਾਂ ਤੇ ਟੁੱਟੀਆਂ ਸੜਕਾਂ, ਖ਼ਰਾਬ ਪਾਰਕ, ਥਾਂ ਥਾਂ ਘੁੰਮਦੇ ਆਵਾਰਾ ਜਾਨਵਰ, ਸੀਵਰੇਜ ਵਿਵਸਥਾ ਦਾ ਬੁਰਾ ਹਾਲ, ਬੇਕਾਬੂ ਟਰੈਫ਼ਿਕ ਅਤੇ ਗੁੰਡਾਗਰਦੀ ਨਜ਼ਰ ਆਉਂਦੀ ਹੈ, ਜੋ ਕਾਂਗਰਸੀ ਵਿਧਾਇਕ ਦੇ ਵਿਕਾਸ ਦੇ ਦਾਅਵਿਆਂ ਦੀ ਪੋਲ ਖੋਲ੍ਹਦੇ ਨਜ਼ਰ ਆਉਂਦੇ ਹਨ। ਇਸ ਸ਼ਬਦ ਪ੍ਰਗਟਾਵਾ ਮੋਹਾਲੀ ਤੋਂ ਭਾਜਪਾ ਦੇ ਉਮੀਦਵਾਰ ਸੰਜੀਵ ਵਸ਼ਿਸ਼ਟ ਨੇ ਸ਼ਾਹੀਮਾਜਰਾ, ਜਗਤਪੁਰਾ ਅਤੇ ਕੰਡਾਲਾ ਪਿੰਡਾਂ ਦਾ ਦੌਰਾ ਕਰਦੇ ਹੋਏ ਕੀਤਾ। ਵਸ਼ਿਸ਼ਟ ਨੇ ਕਿਹਾ ਕਿ ਕਾਂਗਰਸੀ ਵਿਧਾਇਕ ਨੇ ਵੋਟਾਂ ਨੇੜੇ ਆਉਂਦੀਆਂ ਵੇਖ ਹਰ ਥਾਂ ਤੇ ਨੀਂਹ ਪੱਥਰ ਅਤੇ ਉਦਘਾਟਨ ਕਰਵਾਉਣੇ ਸ਼ੁਰੂ ਕਰ ਦਿਤੇ। ਇਹੀ ਕਾਰਨ ਹੈ ਕਿ ਅੱਜ ਉਹੀ ਉਦਘਾਟਨੀ ਪੱਥਰ ਸਿੱਧੂ ਦੇ ਵਿਕਾਸ ਦੀ ਕਹਾਣੀ ਦੱਸ ਰਹੇ ਹਨ।

ਵਸ਼ਿਸ਼ਟ ਨੇ ਕਿਹਾ ਕਿ ਜੋ ਵੀ ਥੋੜਾ ਬਹੁਤ ਮੋਹਾਲੀ ਜ਼ਿਲ੍ਹੇ ਵਿਚ ਵਿਕਾਸ ਹੋਇਆ ਹੈ ਉਹ ਵੀ ਕੇਂਦਰ ਦੀ ਅ੍ਰਮੁਤ ਯੋਜਨਾ ਤਹਿਤ ਨਜ਼ਰ ਆਉਂਦਾ ਹੈ। ਜਿਸ ਨੂੰ ਸ਼ਰਾਰਤੀ ਤੱਤ ਕਾਂਗਰਸੀ ਉਪਲਬਧੀ ਦਸ ਰਹੇ ਹਨ।ਪਰ ਮੋਹਾਲੀ ਦੇ ਲੋਕ ਪੜੇ ਲਿਖੇ ਅਤੇ ਸਿਆਣੇ ਹਨ। ਉਹ ਝੂਠੀਆਂ ਗੱਲਾਂ ਵਿਚ ਨਾ ਆਕੇ ਭਾਜਪਾ ਦੀ ਵਿਕਾਸ ਕਰਾਉਣ ਵਾਲੀ ਸਰਕਾਰ ਬਣਾਉਣ ਦਾ ਮਨ ਬਣਾ ਚੁੱਕੇ ਹਨ।ਇਸ ਦੇ ਨਾਲ ਹੀ ਵਸ਼ਿਸ਼ਟ ਨੇ ਆਮ ਆਦਮੀ ਪਾਰਟੀ ਨੂੰ  ਲੰਬੇ ਹੱਥੀ ਲੈਂਦੇ ਹੋਏ ਕਿਹਾ ਕਿ ਆਮ ਆਦਮੀ ਪਾਰਟੀ ਪੰਜਾਬ ਨੂੰ ਲੁੱਟਣ ਲਈ ਆਈ ਹੈ। ਜਿਸ ਨੇ ਧਨਾਢ ਉਮੀਦਵਾਰਾਂ ਨੂੰ ਸੀਟਾਂ ਵੇਚੀਆਂ ਹਨ। ਇਸ ਲਈ ਲੋਕ ਆਸਾਨੀ ਨਾਲ ਸਮਝ ਸਕਦੇ ਹਨ ਕਿ ਜਿਸ ਨੇ ਪੈਸੇ ਦੇ ਕੇ ਸੀਟ ਲਈ ਹੈ ਉਹ ਹਲਕੇ ਦਾ ਕਿੰਨਾ ਕੁ ਵਿਕਾਸ ਕਰੇਗਾ। ਰਾਤੋਂ ਰਾਤ ਆਮ ਆਦਮੀ ਪਾਰਟੀ ਵਿਚ ਸ਼ਾਮਿਲ ਹੋਏ ਆਪ ਦੇ ਉਮੀਦਵਾਰ ਵੀ ਉਨ੍ਹਾਂ ਧਨਾਢਾਂ ਵਿਚੋਂ ਇਕ ਹਨ। ਉਨ੍ਹਾਂ ਕਿਹਾ ਕਿ ਆਪ ਪੂਰੀ ਤਰ੍ਹਾਂ ਦੂਰ-ਦਰਸ਼ੀ ਅਤੇ ਨੇਤਾ ਰਹਿਤ ਪਾਰਟੀ ਹੈ, ਜੋ ਪੰਜਾਬ ਦੇ ਭੋਲੇ-ਭਾਲੇ ਲੋਕਾਂ ਨੂੰ ਗੁਮਰਾਹ ਕਰਕੇ ਪੰਜਾਬ ਦੀ ਸੱਤਾ 'ਤੇ ਕਾਬਜ਼ ਹੋਣਾ ਚਾਹੁੰਦੇ ਹਨ।ਵਸ਼ਿਸ਼ਟ ਨੇ ਕਿਹਾ ਕਿ ਪੰਜਾਬ 'ਚ ਵੱਡੇ ਘਰਾਨਿਆਂ ਨੂੰ ਟਿਕਟਾਂ ਦੇ ਕੇ 'ਆਪ' ਨੇ ਸਾਬਤ ਕਰ ਦਿੱਤਾ ਹੈ ਕਿ ਆਮ ਆਦਮੀ ਪਾਰਟੀ ਆਮ ਲੋਕਾਂ ਦੀ ਨਹੀਂ ਸਗੋਂ ਖ਼ਾਸ ਲੋਕਾਂ ਦੀ ਪਾਰਟੀ ਹੈ।