ਐਸ ਐਸ ਪੀ ਤੇ ਏ ਡੀ ਸੀ ਵੱਲੋਂ ਫਲਾਇੰਗ ਸਕੁਐਡ ਤੇ ਸਟੈਟਿਕ ਸਰਵੇਲੈਂਸ ਟੀਮਾਂ ਕਾਰਗੁਜ਼ਾਰੀ ਦੀ ਸਮੀਖਿਆ

ਜ਼ਿਲ੍ਹੇ ’ਚ 27 ਸਟੈਟਿਕ ਸਰਵੇਲੈਂਸ ਅਤੇ 9 ਫਲਾਇੰਗ ਸਕੂਐਡ ਸਰਗਰਮ

5 Dariya News

ਨਵਾਂਸ਼ਹਿਰ 05-Feb-2022

ਐਸ ਐਸ ਪੀ ਕੰਵਰਦੀਪ ਕੌਰ ਅਤੇ ਏ ਡੀ ਸੀ (ਯੂ ਡੀ) ਮੇਜਰ ਅਮਿਤ ਸਰੀਨ ਨੇ ਅੱਜ ਜ਼ਿਲ੍ਹੇ ’ਚ ਕਾਰਜਸ਼ੀਲ 27 ਸਟੈਟਿਕ ਸਰਵੇਲੈਂਸ ਟੀਮਾਂ ਅਤੇ 9 ਫਲਾਇੰਗ ਸਕੂਐਡ ਟੀਮਾਂ ਨਾਲ ਮੀਟਿੰਗ ਕਰਕੇ, ਉਨ੍ਹਾਂ ਦੀ ਕਾਰਗੁਜ਼ਾਰੀ ਦੀ ਸਮੀਖਿਆ ਕੀਤੀ।ਐਸ ਐਸ ਪੀ ਨੇ ਇਸ ਮੌਕੇ ਆਖਿਆ ਕਿ ਚੋਣ ਅਮਲ ਨੂੰ ਨਿਰਪੱਖ ਅਤੇ ਨਿਰਵਿਘਨ ਬਣਾਉਣ ਲਈ ਸਟੈਟਿਕ ਸਰਵੇਲੈਂਸ ਅਤੇ ਫਲਾਇੰਗ ਸਕੂਐਡ ਟੀਮਾਂ ਦੀ ਅਹਿਮ ਜ਼ਿੰਮੇਂਵਾਰੀ ਹੈ। ਉਨ੍ਹਾਂ ਕਿਹਾ ਕਿ ਪੁਲਿਸ ਅਤੇ ਸਿਵਲ ਅਧਿਕਾਰੀਆਂ ’ ਤੇ ਤਾਇਨਾਤ ਇਹ ਟੀਮਾਂ ਕਿਸੇ ਵੀ ਤਰ੍ਹਾਂ ਦੇ ਨਸ਼ੇ, ਪੈਸੇ, ਕੀਮਤੀ ਸਮਾਨ ਨੂੰ ਕਿਸੇ ਵੀ ਹਾਲਤ ਵਿੱਚ ਆਪਣੀ ਤਿੱਖੀ ਨਜ਼ਰ ਤੋਂ ਬਚ ਕੇ ਨਾ ਜਾਣ ਦੇਣ। ਉਨ੍ਹਾਂ ਕਿਹਾ ਕਿ ਜ਼ਿਲ੍ਹੇ ’ਚ ਲੱਗੇ ਨਾਕਿਆਂ ’ਤੇ ਕਿਸੇ ਵੀ ਸ਼ੱਕੀ ਗੱਡੀ ਨੂੰ ਬਿਨਾਂ ਚੈਕਿੰਗ ਨਾ ਜਾਣ ਦਿੱਤਾ ਜਾਵੇ। ਉਨ੍ਹਾਂ ਕਿਹਾ ਕਿ ਸਟੈਟਿਕ ਸਰਵੇਲੈਂਸ ਟੀਮਾਂ ਜੋ ਕਿ 24 ਘੰਟੇ ਸ਼ਿਫ਼ਟਾਂ ’ਚ ਤਾਇਨਾਤ ਹਨ, ਦੀ ਜ਼ਿੰਮੇਂਵਾਰੀ ਇਸ ਵੇਲੇ ਸਭ ਤੋਂ ਜ਼ਿਆਦਾ ਹੈ। ਉਨ੍ਹਾਂ ਕਿਹਾ ਕਿ ਚੈਕਿੰਗ ਦੌਰਾਨ ਇਸ ਗੱਲ ਦਾ ਖ਼ਾਸ ਖਿਆਲ ਰੱਖਿਆ ਜਾਵੇ ਕਿ ਆਮ ਜਨਤਾ ਨੂੰ ਕਿਸੇ ਕਿਸਮ ਦੀ ਪ੍ਰੇਸ਼ਾਨੀ ਨਾ ਆਵੇ ਪਰ ਸ਼ੱਕੀ ਵਾਹਨ ਜਾਂ ਵਿਅਕਤੀ ਨੂੰ ਕਿਸੇ ਵੀ ਹਾਲਤ ’ਚ ਛੱਡਿਆ ਨਾ ਜਾਵੇ।

ਉਨ੍ਹਾਂ ਨੇ ਫਲਾਇੰਗ ਸਕੂਐਡ ਟੀਮਾਂ ਨੂੰ ਵੀ ਹਦਾਇਤ ਕੀਤੀ ਕਿ ਉਹ ਫ਼ੋਨ ਜਾਂ ਸੁਨੇਹਾ ਉਡੀਕਣ ਦੀ ਬਜਾਏ ਸਿੱਧੇ ਤੌਰ ’ਤੇ ਕਾਰਵਾਈ ਕਰਨ ਅਤੇ 24 ਘੰਟੇ ਸਰਗਰਮ ਰਹਿੰਦੇ ਹੋਏ, ਆਪੋ-ਆਪਣੀ ਕਾਰਵਾਈ ਦਿਖਾਉਣ। ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਸਾਰੀਆਂ ਟੀਮਾਂ ’ਚ ਪੁਲਿਸ ਅਤੇ ਸਿਵਲ ਅਧਿਕਾਰੀ ਸਮੇਤ ਵਾਹਨ, ਵੀਡੀਓ ਕੈਮਰੇ ਅਤੇ ਸੀ ਸੀ ਟੀ ਵੀ ਕੈਮਰੇ ਲਾਈਆਂ ਹੋਈਆਂ ਹਨ, ਇਸ ਲਈ ਚੋਣ ਅਮਲ ’ਚ ਪੂਰੀ ਚੌਕਸੀ ਦਿਖਾਈ ਜਾਵੇ।ਮੇਜਰ ਅਮਿਤ ਸਰੀਨ ਨੇ ਇਨ੍ਹਾਂ ਟੀਮਾਂ ਨੂੰ ਸੈਨਿਕਾਂ ਵਾਲੀ ਭਾਵਨਾ ਨਾਲ ਕੰਮ ਕਰਨ ਦੀ ਹਦਾਇਤ ਕਰਦਿਆਂ ਕਿਹਾ ਕਿ ਉਨ੍ਹਾਂ ਨੇ ਇਸ ਚੋਣ ਅਮਲ ਨੂੰ ਨਿਰਪੱਖ ਅਤੇ ਭੈਅ ਰਹਿਤ ਬਣਾਉਣਾ ਹੈ। ਜੇਕਰ ਉਹ ਆਪਣੀ ਡਿਊਟੀ ਨੂੰ ਤਨਦੇਹੀ ਨਾਲ ਨਹੀਂ ਕਰਨਗੇ ਤਾਂ ਅਸੀਂ ਆਪਣੇ ਦੇਸ਼ ਪ੍ਰਤੀ ਆਪਣੀ ਭਾਵਨਾ ’ਚ ਗੁਨਾਹਗਾਰ ਹੋਵਾਂਗੇ। ਉਨ੍ਹਾਂ ਕਿਹਾ ਕਿ ਜੇਕਰ ਚੈਕਿੰਗ ਦੌਰਾਨ ਨਗਦੀ ਫੜੀ ਜਾਂਦੀ ਹੈ ਤਾਂ ਤੁਰੰਤ ਆਮਦਨ ਕਰ ਅਧਿਕਾਰੀਆਂ ਨੂੰ, ਸ਼ਰਾਬ ਫੜੀ ਜਾਣ ’ਤੇ ਆਬਕਾਰੀ ਅਧਿਕਾਰੀਆਂ ਨੂੰ, ਨਸ਼ਾ ਫੜਿਆ ਜਾਣ ’ਤੇ ਨਾਰਕੋਟਿਕਸ ਅਧਿਕਾਰੀਆਂ ਨੂੰ ਅਤੇ ਸੋਨਾ ਜਾਂ ਹੋਰ ਸਮਾਨ ਫੜੇ ਜਾਣ ’ਤੇ ਜੀ ਐਸ ਟੀ ਅਧਿਕਾਰੀਆਂ ਨੂੰ ਸੂਚਿਤ ਕੀਤਾ ਜਾਵੇ। ਉਨ੍ਹਾਂ ਕਿਹਾ ਕਿ ਕੋਈ ਵੀ ਟੀਮ ਸਬੰਧਤ ਅਧਿਕਾਰੀਆਂ ਵੱਲੋਂ ਵਾਜਿਬ ਕਾਰਨ ਦੱਸੇ ਜਾਣ ਜਾਂ ਯੋਗ ਦਸਤਾਵੇਜ਼ ਦਿਖਾਏ ਜਾਣ ਤੋਂ ਬਾਅਦ ਹੀ ਸਬੰਧਤ ਵਿਅਕਤੀ ਨੂੰ ਛੱਡੇਗੀ ਅਤੇ ਇਨ੍ਹਾਂ ਹਦਾਇਤਾਂ ਦੀ ਸਖਤੀ ਨਾਲ ਪਾਲਣਾ ਕੀਤੀ ਜਾਵੇ।ਇਸ ਮੌਕੇ ਐਸ ਪੀ (ਐਚ) ਮਨਵਿੰਦਰ ਬੀਰ ਸਿੰਘ ਤੇ ਹੋਰ ਪੁਲਿਸ ਅਧਿਕਾਰੀ ਤੇ ਸਮੂਹ ਟੀਮਾਂ ਮੌਜੂਦ ਸਨ।