ਭੇਦਭਰੀ ਹਾਲਤ 'ਚ ਗੁੰਮ ਵਿਦਿਆਰਥੀ ਦੀ ਲਾਸ਼ ਸੁਧਾਰ ਨਹਿਰ ਵਿੱਚੋਂ ਮਿਲੀ, ਕਤਲ ਦੀ ਅਕੰਸ਼ਾ

5 ਦਰਿਆ ਨਿਊਜ਼(ਸਾਹਿਬ ਸੰਧੂ)

ਭਦੌੜ/ਸ਼ਹਿਣਾ 16-Mar-2014

ਬੀਤੀ 12 ਮਾਰਚ ਤੋਂ ਜੀ.ਐਚ.ਜੀ. ਖਾਲਸਾ ਕਾਲਜ ਸੁਧਾਰ ਦੇ ਹੋਸਟਲ ਚੋਂ ਭੇਦਭਰੀ ਹਾਲਤ 'ਚ ਲਾਪਤਾ ਹੌਏ ਭਦੌੜ ਦੇ ਵਿਦਿਆਰਥੀ ਦੀਪਗ ਗਰਗ ਪੁੱਤਰ ਦੀਨਦਿਆਲ ਗਰਗ ਦੀ ਲਾਸ਼ ਅੱਜ ਸੁਧਾਰ ਤੋਂ ਮਹਿਜ ਕੁੱਝ ਗਜ਼ ਦੀ ਦੂਰੀ ਤੋਂ ਹੀ ਨਹਿਰ ਚੋਂ ਬਰਾਮਦ ਹੋ ਗਈ। ਮਾਪਿਆਂ ਦੇ ਇਕਲੌਤੇ ਪੁੱਤਰ ਦੀ ਲਾਸ਼ ਮਿਲਣ ਦੀ ਖ਼ਬਰ ਸੁਣਦਿਆਂ ਹੀ ਇਲਾਕੇ 'ਚ ਸੋਗ ਦੀ ਲਹਿਰ ਫੈਲ ਗਈ। ਜ਼ਿਕਰਯੋਗ ਹੈ ਕਿ ਮ੍ਰਿਤਕ ਦੀਪਕ ਗਰਗ ਸੁਧਾਰ ਕਾਲਜ ਵਿਖੇ ਬੀ.ਐਸ.ਸੀ. ਫਾਈਨਲ ਦਾ ਵਿਦਿਆਰਥੀ ਸੀ ਅਤੇ ਬੀਤੀ 12 ਮਾਰਚ ਤੋਂ ਲਾਪਤਾ ਸੀ ਅਤੇ ਉਸਦੇ ਕਮਰੇ ਚੋਂ ਉਸਦਾ ਪਰਸ, ਨਕਦੀ, ਐਨਕਾਂ, ਬੂਟ ਅਤੇ ਹੋਰ ਸਮਾਨ ਸਹੀ ਸਲਾਮਤ ਮਿਲਿਆ ਸੀ ਪ੍ਰੰਤੂ ਦੀਪਕ ਭੇਦਭਰੇ ਢੰਗ ਨਾਲ ਗਾਇਬ ਸੀ।

ਸੂਤਰਾਂ ਅਨੁਸਾਰ ਉਥੋਂ ਇੱਕ ਖੁਦਕੁਸ਼ੀ ਨੋਟ ਵੀ ਮਿਲਿਆ ਸੀ। ਦੀਪਕ ਪੜ੍ਹਾਈ 'ਚ ਇੱਕ ਹੁਸ਼ਿਆਰ ਵਿਦਿਆਰਥੀ ਅਤੇ ਘਰੋਂ ਖੁਸ਼ਹਾਲ ਸੀ। ਪੰਜ ਦਿਨ ਤੋਂ ਲਾਪਤਾ ਦੀਪਕ ਦੀ ਲਾਸ਼ ਦਾ ਸੁਧਾਰ ਨਹਿਰ ਚੋਂ ਕੁੱਝ ਫਰਲਾਂਗ ਦੀ ਦੂਰੀ ਤੋਂ ਹੀ ਮਿਲਣਾ ਕਈ ਸਵਾਲ ਖੜ੍ਹੇ ਕਰਦਾ ਹੈ। ਸੂਤਰ ਦੱਸਦੇ ਹਨ ਕਿ ਲਾਸ਼ ਪਿਛਲੇ ਪੰਜ ਦਿਨ ਤੋਂ ਪਾਣੀ 'ਚ ਡੁੱਬੀ ਨਹੀਂ ਲੱਗ ਰਹੀ ਕਿਉਂਕਿ ਲਾਸ਼ ਸਹੀ ਸਲਾਮਤ ਲੱਗ ਰਹੀ ਹੈ। ਜਿਸ ਕਰਕੇ ਇਹ ਮਾਮਲਾ ਖੁਦਕੁਸ਼ੀ ਦੀ ਬਜਾਏ ਕਤਲ ਦਾ ਜਾਪ ਰਿਹਾ ਹੈ। ਪੁਲਸ ਪ੍ਰਸ਼ਾਸ਼ਨ ਦਾ ਕਹਿਣਾ ਹੈ ਕਿ ਅਸਲ ਸਥਿਤੀ ਪੋਸਟਮਾਰਟਮ ਉਪਰੰਤ ਸਾਹਮਣੇ ਆ ਜਾਵੇਗੀ। ਦੇਰ ਸਾਮ ਉਕਤ ਨੌਜਵਾਨ ਦੀ ਲਾਸ਼ ਭਦੌੜ ਆਉਣ ਤੇ ਸਮੁੱਚਾ ਪਿੰਡ ਸੋਗ ਵਿੱਚ ਡੁੱਬਿਆ ਹੋਇਆ ਸੀ ਤੇ ਦਾਰ ਸਾਮ ਉਕਤ ਨੌਜਵਾਨ ਦਾ ਸੰਸਕਾਰ ਕੀਤਾ ਜਾ ਰਿਹਾ ਹੈ।