ਕੈਨੇਡਾ ਦੇ ਸਸਕੈਚਿਉਵਨ ਸੂਬੇ ਦੇ ਖੇਤੀ ਮੰਤਰੀ ਵੱਲੋਂ ਮੁੱਖ ਮੰਤਰੀ ਨਾਲ ਮੁਲਾਕਾਤ

ਭੰਡਾਰਨ, ਭੋਜਨ ਸੰਭਾਲ, ਬਾਇਓ-ਸਾਇੰਸ ਅਤੇ ਮੱਕੀ ਅਤੇ ਸੋਇਆਬੀਨ ਦੀ ਕਾਸਤ ਵਿਚ ਪੰਜਾਬ ਨਾਲ ਸਹਿਯੋਗ ਕਰਨ ਵਿਚ ਵਿਖਾਈ ਦਿਲਚਸਪੀ

5 ਦਰਿਆ ਨਿਊਜ਼

ਚੱਪੜਚਿੜੀ, ਐਸ.ਏ.ਐਸ. ਨਗਰ 18-Feb-2014

ਕੈਨੇਡਾ ਦਾ ਸਸਕੈਚਿਉਵਨ ਸੂਬੇ ਦੇ ਖੇਤੀ ਮੰਤਰੀ ਲਾਇਲ ਸਟੀਵਾਰਟ ਨੇ ਸੂਬੇ ਵਿਚ ਅਨਾਜ ਭੰਡਾਰਨ, ਭੋਜਨ ਸੰਭਾਲ ਦੀ ਤਕਨੀਕ ਵਿਕਸਤ ਕਰਨ, ਬਾਇਓ-ਸਾਇੰਸ ਅਤੇ ਮੱਕੀ ਦੀਆਂ ਨਵੀਂਆਂ ਕਿਸਮਾਂ ਦੀ ਖੋਜ ਅਤੇ ਸੋਇਆਬੀਨ ਦੀ ਕਾਸਤ ਵਿਚ ਪੰਜਾਬ ਨਾਲ ਸਹਿਯੋਗ ਕਰਨ ਵਿਚ ਵਿਸੇਸ਼ ਦਿਲਚਸਪੀ ਵਿਖਾਈ ਹੈ।ਸਟੀਵਾਰਟ ਦੀ ਅਗਵਾਈ ਵਿਚ ਅੱਜ ਕੈਨੇਡਾ ਦੇ ਇਕ ਵਫਦ ਨੇ ਪ੍ਰਗਤੀਸ਼ੀਲ ਪੰਜਾਬ ਖੇਤੀਬਾੜੀ ਸੰਮੇਲਨ ਦੇ ਤੀਜੇ ਦਿਨ ਪੰਜਾਬ ਦੇ ਮੁੱਖ ਮੰਤਰੀ ਸ: ਪਰਕਾਸ਼ ਸਿੰਘ ਬਾਦਲ ਨਾਲ ਇੱਥੇ ਮੁਲਾਕਾਤ ਕੀਤੀ। ਮੁੱਖ ਮੰਤਰੀ ਨਾਲ ਵਿਚਾਰ ਵਟਾਂਦਰੇ ਦੌਰਾਨ ਸ੍ਰੀ ਸਟੀਵਾਰਟ ਨੇ ਕਿਹਾ ਕਿ ਪੰਜਾਬ ਅਤੇ ਕੈਨੇਡਾ ਦਰਮਿਆਨ ਇਨ੍ਹਾਂ ਵਿਸ਼ਿਆਂ ਤੇ ਦੁਵੱਲੇ ਸਹਿਯੋਗ ਦੀਆਂ ਵੱਡੀਆਂ ਸੰਭਾਵਨਾਵਾਂ ਹਨ ਕਿਉਂਕਿ ਦੋਹਾਂ ਦਾ ਖੇਤੀ ਬਾੜੀ ਵਿਚ ਲੰਬਾ ਤਜਰਬਾ ਹੈ। ਉਨ੍ਹਾਂ ਪੰਜਾਬ ਦੇ ਮੁੱਖ ਮੰਤਰੀ ਦੀ ਸਰਾਹਣਾ ਕਰਦਿਆਂ ਕਿਹਾ ਕਿ ਪੰਜਾਬ ਅਤੇ ਕੈਨੇਡਾ ਵੈਟਰਨਰੀ ਸਾਇੰਸ ਦੇ ਖੇਤਰ ਵਿਚ ਪਹਿਲਾਂ ਹੀ ਮਿਲ ਕੇ ਕੰਮ ਕਰ ਰਹੇ ਹਨ ਅਤੇ ਦੂਜੇ ਸਹਾਇਕ ਕਿੱਤਿਆਂ ਵਿਚ ਵੀ ਆਪਸੀ ਸਹਿਯੋਗ ਦੀਆਂ ਵੱਡੀਆਂ ਸੰਭਾਵਨਾਵਾਂ ਹਨ। ਸ੍ਰੀ ਸਟੀਵਾਰਟ ਨੇ ਮੁੱਖ ਮੰਤਰੀ ਸ: ਬਾਦਲ ਨੂੰ ਭਰੋਸਾ ਕਿ ਉਹ ਗਲੋਬਲ ਵਾਟਰ ਸਕਿਊਰਟੀ ਇਸਟੀਚਿਊਟ ਸੈਸਕਟੂਨ ਦੇ ਰਾਹੀਂ ਪੰਜਾਬ ਦੇ ਦੱਖਣ ਪੱਛਮੀ ਜ਼ਿਲ੍ਹਿਆਂ ਵਿਚ ਖਾਰੇ ਪਾਣੀ ਅਤੇ ਸੇਮ ਦੀ ਸਮੱਸਿਆ ਦੇ ਹੱਲ ਲਈ ਵੀ ਸਹਿਯੋਗ ਕਰਣਗੇ।ਸ੍ਰੀ ਸਟੀਵਾਰਟ ਨੇ ਕੈਨੇਡਾ ਵਿਚ ਜੂਨ ਮਹੀਨੇ ਦੌਰਾਨ ਹੋਣ ਵਾਲੇ 'ਫਾਰਮ ਸ਼ੋਅ' ਲਈ ਪੰਜਾਬ ਦੇ ਵਫਦ ਨੂੰ ਸੱਦਾ ਦਿੰਦਿਆਂ ਉਨ੍ਹਾਂ ਨੇ ਪੰਜਾਬ ਦੇ ਮੁੱਖ ਮੰਤਰੀ ਵੱਲੋਂ ਦੋਹਾਂ ਦੇਸਾਂ ਵਿਚ ਕਿਸਾਨਾਂ ਦੇ ਵਟਾਂਦਰਾ ਪ੍ਰੋਗਰਾਮ ਸ਼ੁਰੂ ਕਰਨ ਦੇ ਸੁਝਾਅ ਦਾ ਵੀ ਜੋਰਦਾਰ ਸਵਾਗਤ ਕੀਤਾ। 

ਉਨ੍ਹਾਂ ਅੱਗੇ ਕਿਹਾ ਕਿ ਸਸਕੈਚਿਉਵਨ ਵੱਲੋਂ ਪੰਜਾਬ ਖੇਤੀਬਾੜੀ ਯੁਨੀਵਰਸਿਟੀ ਨਾਲ ਤੇਲ ਬੀਜਾਂ ਦੀਆਂ ਨਵੀਂਆਂ ਕਿਸਮਾਂ ਦੀ ਖੋਜ ਕਰਨ ਦੇ ਕਰਾਰ ਵਾਂਗ ਹੀ ਗੁਰੂ ਅੰਗਦ ਦੇਵ ਵੈਟਰਨਰੀ ਯੂਨੀਵਰਸਿਟੀ ਨਾਲ ਵਿਦਿਆਰਥੀਆਂ ਦੇ ਵਟਾਂਦਰੇ ਦੇ ਪ੍ਰੋਗਰਾਮ ਨੂੰ ਵੀ ਸ਼ੁਰੂ ਕਰਨ ਦਾ ਇੱਛੁਕ ਹੈ। ਇਸ ਮੌਕੇ ਮੁੱਖ ਮੰਤਰੀ ਨੇ ਕਿਹਾ ਕਿ ਪ੍ਰਗਤੀਸ਼ੀਲ ਪੰਜਾਬ ਖੇਤੀਬਾੜੀ ਸੰਮੇਲਨ ਹਰ ਸਾਲ ਆਯੋਜਿਤ ਹੋਇਆ ਕਰੇਗਾ ਅਤੇ ਅੱਗੇ ਤੋਂ ਇਸ ਸਬੰਧੀ ਅਗਾਉਂ ਸੂਚਨਾ ਕੈਨੇਡਾ ਨੂੰ ਦਿੱਤੀ ਜਾਵੇਗੀ ਤਾਂ ਜੋ ਉੱਥੋਂ ਹੋਰ ਵਧੇਰੇ ਵਫਦ ਇਸ ਮੈਗਾ ਸੰਮਲੇਨ ਵਿਚ ਭਾਗ ਲੈਣ ਲਈ ਪੁੱਜ ਸਕਣ। ਉਨ੍ਹਾਂ ਕਿਹਾ ਕਿ ਪੰਜਾਬ ਸਸਕੈਚਿਉਵਨ ਯੂਨੀਵਰਸਿਟੀ ਅਤੇ ਪੰਜਾਬ ਦੀਆਂ ਵੈਟਰਨਰੀ ਅਤੇ ਖੇਤੀਬਾੜੀ ਯੂਨੀਵਰਸਿਟੀਆਂ ਨਾਲ ਪਸ਼ੂਧਨ ਦੇ ਨਾਲ ਨਾਲ ਮੱਕੀ ਅਤੇ ਸੋਇਆਬੀਨ ਦੀਆਂ ਨਵੀਂਆਂ ਕਿਸਮਾਂ ਵਿਕਸਤ ਕਰਨ ਦੇ ਪ੍ਰੋਗਰਾਮ ਦਾ ਸਵਾਗਤ ਕਰੇਗਾ। ਸ: ਬਾਦਲ ਨੇ ਸਸਕੈਚਿਉਵਨ ਯੂਨੀਵਰਸਿਟੀ ਅਤੇ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਵਿਚਕਾਰ ਵਿਦਿਆਰਥੀਆਂ ਦੇ ਵਟਾਂਦਰਾ ਪ੍ਰੋਗਰਾਮ ਦੇ ਨਾਲ ਨਾਲ ਕਿਸਾਨਾਂ ਦੇ ਵਟਾਂਦਰਾ ਪ੍ਰੋਗਰਾਮ ਨੂੰ ਵੀ ਵਿਧੀਪੂਰਵਕ ਸ਼ੁਰੂ ਕਰਨ ਦੀ ਲੋੜ ਤੇ ਜੋਰ ਦਿੰਦਿਆਂ ਕਿਹਾ ਕਿ ਇਸ ਨਾਲ ਦੋਹਾਂ ਦੇਸ਼ਾਂ ਵਿਚਕਾਰ ਤਕਨੀਕ ਦਾ ਬਿਹਤਰ ਵਟਾਂਦਰਾ ਸੰਭਵ ਹੋ ਸਕੇਗਾ। ਇਸ ਮੌਕੇ ਮੁੱਖ ਮੰਤਰੀ ਨਾਲ ਵਿੱਤ ਕਮਿਸ਼ਨਰ ਵਿਕਾਸ ਸ੍ਰੀ ਸੁਰੇਸ਼ ਕੁਮਾਰ ਅਤੇ ਉਨ੍ਹ ਦੇ ਵਿਸੇਸ਼ ਪ੍ਰਮੁੱਖ ਸਕੱਤਰ ਸ: ਗਗਨਦੀਪ ਸਿੰਘ ਬਰਾੜ ਵੀ ਹਾਜਰ ਸਨ ਜਦ ਕਿ ਕੈਨੇਡਾ ਦੇ ਵਫਦ ਵਿਚ ਉਪ ਖੇਤੀਬਾੜੀ ਮੰਤਰੀ ਸ੍ਰੀ ਰਿੱਕ ਬਰਟਨ ਅਤੇ ਸ੍ਰੀ ਸਟੀਵਾਰਟ ਦੇ ਚੀਫ ਆਫ ਸਟਾਫ ਸ੍ਰੀ ਟੇਲਰ ਲਾਇੰਚ ਵੀ ਸ਼ਾਮਿਲ ਸਨ।