ਖੋਜ ਖੇਤਰ ਨੂੰ ਹੋਰ ਹੁਲਾਰਾ ਦੇਣ ਲਈ ਚਿਤਕਾਰਾ ਅਤੇ ਸੀ.ਡੈੱਕ ਨੇ ਮਿਲਾਇਆ ਹੱਥ; ਦੋਹਾਂ ਦਰਮਿਆਨ ਐਮਓਯੂ ਸਾਈਨ

ਸਾਈਬਰ ਸੁਰੱਖਿਆ, ਐਗਰੋਟੈੱਕ, ਸਿਹਤ ਸੰਭਾਲ ਅਤੇ ਕੰਪਿਊਟਿੰਗ ਦੇ ਖੇਤਰਾਂ ਵਿੱਚ ਕਰਨਗੇ ਤਾਲਮੇਲ

5 Dariya News

ਬਨੂੜ/ਰਾਜਪੁਰਾ 10-May-2021

ਚਿਤਕਾਰਾ ਯੂਨੀਵਰਸਿਟੀ ਪੰਜਾਬ ਅਤੇ ਸੈਂਟਰ ਫ਼ਾਰ ਡਿਵੈਲਪਮੈਂਟ ਆਫ਼ ਐਡਵਾਂਸ ਕੰਪਿਊਟਿੰਗ (ਸੀ.ਡੈੱਕ) ਮੁਹਾਲੀ ਨੇ ਖੋਜ ਅਤੇ ਨਵੀਨਤਾ ਨੂੰ ਹੁਲਾਰਾ ਦੇਣ ਲਈ ਸਾਂਝੇ ਐਮਓਯੂ ਉੱਤੇ ਹਸਤਾਖਰ ਕੀਤੇ ਹਨ। ਸੀ.ਡੈੱਕ ਦੇ 33ਵੇਂ ਸਥਾਪਨਾ ਦਿਵਸ ਮੌਕੇ ਹੋਏ ਵਰਚੂਅਲ ਸਮਾਰੋਹ ਵਿੱਚ ਇਸ ਸਮਝੌਤੇ ਉੱਤੇ ਸਹੀ ਪਾਈ ਗਈ।ਚਿਤਕਾਰਾ ਵੱਲੋਂ ਪ੍ਰੋ ਚਾਂਸਲਰ ਡਾ ਮਧੂ ਚਿਤਕਾਰਾ ਅਤੇ ਸੀ.ਡੈੱਕ ਵੱਲੋਂ ਸੰਸਥਾ ਦੇ ਕਾਰਜਕਾਰੀ ਨਿਰਦੇਸ਼ਕ ਡਾ ਪੀ.ਕੇ. ਖੋਸਲਾ ਨੇ ਸਮਝੌਤੇ ਤੇ ਹਸਤਾਖਰ ਕੀਤੇ। ਇਸ ਸਮਾਰੋਹ ਵਿੱਚ ਸੀ.ਡੈੱਕ ਅਤੇ ਚਿਤਕਾਰਾ ਦੇ ਸਮੁੱਚੇ ਅਧਿਕਾਰੀਆਂ ਨੇ ਸ਼ਿਰਕਤ ਕੀਤੀ ਅਤੇ ਮੁੱਖ ਮਹਿਮਾਨ ਵਜੋਂ ਨੀਤੀ ਆਯੋਗ ਦੇ ਮੈਂਬਰ ਡਾ ਵੀ.ਕੇ.ਸਾਰਸਵਤ ਨੇ ਸ਼ਮੂਲੀਅਤ ਕੀਤੀ। ਉਨਾਂ ਦੋਹਾਂ ਸੰਸਥਾਵਾਂ ਨੂੰ ਵਧਾਈ ਦਿੰਦਿਆਂ ਇਸ ਨੂੰ ਖੋਜ ਅਤੇ ਤਕਨਾਲੋਜੀ ਦੇ ਖੇਤਰ ਵਿੱਚ ਵੱਡਾ ਅਤੇ ਸਾਰਥਿਕ ਕਦਮ ਦੱਸਿਆ।ਇਸ ਸਮਝੌਤੇ ਤਹਿਤ ਸੀਡੈੱਕ ਅਤੇ ਚਿਤਕਾਰਾ ਸਾਈਬਰ ਸੁਰੱਖਿਆ, ਐਗਰੀਟੈੱਕ, ਸਿਹਤ ਸੰਭਾਲ ਅਤੇ ਕਲਾਊਂਡ ਕੰਪਾਊਂਡਿੰਗ ਦੇ ਖੇਤਰ ਵਿੱਚ ਖੋਜ ਅਤੇ ਨਵੀਨਤਾ ਨੂੰ ਅਦਾਨ-ਪ੍ਰਦਾਨ ਕੀਤਾ ਜਾਵੇਗਾ। ਸੀਡੈੱਕ ਦੇ ਨਿਰਦੇਸ਼ਕ ਡਾ ਪੀਕੇ ਖੋਸਲਾ ਨੇ ਇਸ ਮੌਕੇ ਬੋਲਦਿਆਂ ਆਖਿਆ ਕਿ ਉਹ ਅਤੇ ਉਨਾਂ ਦੀ ਟੀਮ ਪਿਛਲੇ ਦਿਨੀਂ ਚਿਤਕਾਰਾ ਯੂਨੀਵਰਸਿਟੀ ਅਤੇ ਉਨਾਂ ਦੀਆਂ ਅਤਿ-ਆਧੁਨਿਕ ਅਤੇ ਵਿਸ਼ਵ ਪੱਧਰੀ ਤਕਨੀਕਾਂ ਨਾਲ ਲੈੱਸ ਲੈਬਜ਼ ਦਾ ਨਿਰੀਖ਼ਣ ਕਰਕੇ ਆਏ ਹਨ, ਜਿਸ ਤੋਂ ਉਹ ਬਹੁਤ ਪ੍ਰਭਾਵਿਤ ਹੋਏ। ਉਨਾਂ ਕਿਹਾ ਕਿ ਚਿਤਕਾਰਾ ਦਾ ਵਿਸ਼ਵ ਪੱਧਰ ਉੱਤੇ ਸਿੱਖਿਆ, ਖੋਜ, ਸਿਹਤ ਸੰਭਾਲ ਖੇਤਰਾਂ ਵਿੱਚ ਵੱਡਾ ਨਾਂ ਹੈ ਅਤੇ ਸੀਡੈੱਕ ਨੂੰ ਚਿਤਕਾਰਾ ਨਾਲ ਜੋੜਨਾ ਸਾਰਿਆਂ ਲਈ ਮਾਣ ਵਾਲੀ ਗੱਲ ਹੈ।ਚਿਤਕਾਰਾ ਦੀ ਵਾਈਸ ਚਾਂਸਲਰ ਡਾ ਅਰਚਨਾ ਚੌਧਰੀ ਨੇ ਇਸ ਮੌਕੇ ਬੋਲਦਿਆਂ ਖੁਸ਼ੀ ਪ੍ਰਗਟ ਕੀਤੀ। ਉਨਾਂ ਕਿਹਾ ਕਿ ਇਸ ਤਾਲਮੇਲ ਅਤੇ ਸਹਿਯੋਗ ਨਾਲ ਅਸੀਂ ਖੋਜ ਦੇ ਖੇਤਰ ਵਿੱਚ ਵੱਡੀ ਛਲਾਂਗ ਲਾਉਣ ਅਤੇ ਵਿਦਿਆਰਥੀਆਂ ਨੂੰ ਨਵੀਨਤਮ ਤਕਨੀਕਾਂ ਰਾਹੀਂ ਖੋਜ ਕਾਰਜਾਂ ਨਾਲ ਜੋੜਨ ਤੇ ਉਨਾਂ ਦੇ ਵਿਚਾਰਾਂ ਨੂੰ ਲੋਕਾਂ ਤੱਕ ਪਹੁੰਚਾਣ ਵਿੱਚ ਕਾਮਯਾਬ ਹੋਵਾਂਗੇ।ਚਿਤਕਾਰਾ ਦੀ ਪ੍ਰੋ ਚਾਂਸਲਰ ਡਾ ਮਧੂ ਚਿਤਕਾਰਾ ਨੇ ਸੀਡੈੱਕ ਨਾਲ ਹੋਏ ਸਮਝੌਤੇ ਨੂੰ ਇਤਿਹਾਸਕ ਕਰਾਰ ਦਿੰਦਿਆਂ ਕਿਹਾ ਕਿ ਇਸਦੇ ਦੂਰਰਸੀ ਸਿੱਟੇ ਨਿਕਲਣਗੇ। ਉਨਾਂ ਦੱਸਿਆ ਕਿ ਚਿਤਕਾਰਾ ਹੁਣ ਤੱਕ 700 ਪੇਟੈਂਟ ਦਾਖਿਲ ਕਰ ਚੁੱਕਿਆ ਹੈ ਤੇ ਅੱਜ ਹੀ ਉਨਾਂ ਦੇ 70ਵੇਂ ਪੇਟੈਂਟ ਨੂੰ ਮਾਨਤਾ ਮਿਲੀ ਹੈ। ਉਨਾਂ ਕਿਹਾ ਕਿ ਯੂਨੀਵਰਸਿਟੀ 1800 ਸਕੋਪਸ ਇੰਡੈਕਸ ਦੀ ਪਬਲੀਕੇਸ਼ਨ ਕਰ ਚੁੱਕੀ ਹੈ। ਉਨਾਂ ਕਿਹਾ ਕਿ ਤਕਨਾਲੋਜੀ ਦੀ ਇਸ ਸਾਂਝ ਨਾਲ ਪੋਸਟ ਗਰੈਜੂਏਟ ਅਤੇ ਪੀਐਚਡੀ ਦੀਆਂ ਡਿਗਰੀਆਂ ਕਰਨ ਵਾਲੇ ਵਿਦਿਆਰਥੀਆਂ ਨੂੰ ਬਹੁਤ ਵੱਡਾ ਲਾਭ ਹੋਵੇਗਾ। ਇਸ ਮੌਕੇ ਐਮਓਯੂ ਉੱਤੇ ਦਸਤਖਤ ਕਰਨ ਉਪਰੰਤ ਦੋਵਾਂ ਸੰਸਥਾਵਾਂ ਦੇ ਅਧਿਕਾਰੀਆਂ ਵੱਲੋਂ ਇੱਕ ਦੂਜੇ ਨਾਲ ਆਪਣੇ ਦਸਤਾਵੇਜ਼ ਅਦਾਨ ਪ੍ਰਦਾਨ ਕੀਤੇ ਗਏ।