ਜਦੋਂ 210 ਕਿਲੋਮੀਟਰ ਦੂਰੋਂ ਬਰਨਾਲਾ ਤੋਂ ਬਟਾਲਾ ਵਿਖੇ ਸ਼ਿਵ ਬਟਾਲਵੀ ਨੂੰ ‘ਹੈਪੀ ਬਰਥ ਡੇਅ’ ਕਹਿਣ ਪਹੁੰਚਿਆ ਸ਼ਿਵ ਦਾ ਪ੍ਰਸ਼ੰਸਕ ਮਨਿੰਦਰ ਸਿੰਘ

5 Dariya News

ਬਟਾਲਾ 23-Jul-2020

ਸ਼ਿਵ ਕੁਮਾਰ ਬਟਾਲਵੀ ਦੇ ਪ੍ਰਸ਼ੰਸਕ ਪੂਰੀ ਦੁਨੀਆਂ ਵਿੱਚ ਹਨ ਅਤੇ ਸ਼ਿਵ ਉਨ੍ਹਾਂ ਦੇ ਦਿਲਾਂ ਵਿੱਚ ਅੱਜ ਵੀ ਜਿਊਂਦਾ ਹੈ। ਸ਼ਿਵ ਬਟਾਲਵੀ ਦਾ ਪਿਆਰ ਉਨ੍ਹਾਂ ਦੇ ਇੱਕ ਪ੍ਰਸ਼ੰਸਕ ਨੂੰ ਅੱਜ 210 ਕਿਲੋਮੀਟਰ ਦੂਰੋਂ ਬਟਾਲਾ ਵਿਖੇ ਖਿੱਚ ਕੇ ਲੈ ਆਇਆ। ਜ਼ਿਲ੍ਹਾ ਬਰਨਾਲਾ ਦੇ ਤਪਾ ਮੰਡੀ ਦੇ ਵਸਨੀਕ ਮਨਿੰਦਰ ਸਿੰਘ ਦੇ ਦਿਲ ਵਿੱਚ ਸ਼ਿਵ ਬਟਾਲਵੀ ਪ੍ਰਤੀ ਏਨਾਂ ਪਿਆਰ ਹੈ ਕਿ ਉਹ ਮੋਟਰਸਾਈਕਲ ਉੱਪਰ ਹੀ 210 ਕਿਲੋਮੀਟਰ ਦਾ ਸਫ਼ਰ ਤਹਿ ਕਰਕੇ ਅੱਜ ਸ਼ਿਵ ਬਟਾਲਵੀ ਦੇ 84ਵੇਂ ਜਨਮ ਦਿਨ ਮੌਕੇ ਉਨ੍ਹਾਂ ਨੂੰ ਹੈਪੀ ਬਰਥਡੇਅ ਕਹਿਣ ਲਈ ਬਟਾਲਾ ਪਹੁੰਚ ਗਿਆ। ਬਟਾਲਾ ਸ਼ਹਿਰ ਪਹੁੰਚਣ ’ਤੇ ਸਭ ਤੋਂ ਮਨਿੰਦਰ ਸਿੰਘ ਨੇ ਸ਼ਿਵ ਬਟਾਲਵੀ ਆਡੀਟੋਰੀਅਮ ਵਿਖੇ ਪਹੁੰਚ ਕੇ ਸ਼ਿਵ ਦੀ ਇਸ ਮਜ਼ਾਰ ਨੂੰ ਸਿਜਦਾ ਕੀਤਾ। ਇਸ ਤੋਂ ਬਾਅਦ ਉਹ ਸ਼ਿਵ ਬਟਾਲਵੀ ਦੇ ਜੱਦੀ ਘਰ ਗਏ ਅਤੇ ਉਨ੍ਹਾਂ ਦੇ ਭਤੀਜੇ ਰਾਜੀਵ ਬਟਾਲਵੀ ਨਾਲ ਮੁਲਾਕਾਤ ਕਰਕੇ ਉਨ੍ਹਾਂ ਨੂੰ ਬਟਾਲਵੀ ਸਾਹਿਬ ਦੇ ਜਨਮ ਦਿਨ ਦੀ ਮੁਬਾਰਕਬਾਦ ਦਿੱਤੀ। ਇਸ ਉਪਰੰਤ ਮਨਿੰਦਰ ਸਿੰਘ ਜ਼ਿਲ੍ਹਾ ਪ੍ਰਸ਼ਾਸਨ ਵਲੋਂ ਕਰਾਏ ਸ਼ਿਵ ਬਟਾਲਵੀ ਨੂੰ ਸਮਰਪਿਤ ਪ੍ਰੋਗਰਾਮ ਵਿੱਚ ਵੀ ਸ਼ਾਮਲ ਹੋਇਆ, ਜਿਥੇ ਤਹਿਸੀਲਦਾਰ ਬਟਾਲਾ ਬਲਜਿੰਦਰ ਸਿੰਘ ਅਤੇ ਹੋਰ ਅਧਿਕਾਰੀਆਂ ਨੇ ਉਨ੍ਹਾਂ ਦਾ ਬਟਾਲਾ ਵਿਖੇ ਪਹੁੰਚਣ ’ਤੇ ਸਵਾਗਤ ਕੀਤਾ ਅਤੇ ਨਾਲ ਹੀ ਸਨਮਾਨ ਵੀ ਕੀਤਾ।ਮਨਿੰਦਰ ਸਿੰਘ ਨੇ ਕਿਹਾ ਕਿ ਉਹ ਸ਼ਿਵ ਬਟਾਲਵੀ ਸਾਹਿਬ ਦਾ ਪ੍ਰਸ਼ੰਸਕ ਹੈ ਅਤੇ ਉਸਨੇ ਉਨ੍ਹਾਂ ਦੀ ਸਾਰੀ ਸ਼ਾਇਰੀ ਪੜ੍ਹੀ ਹੋਈ ਹੈ। ਉਸਨੇ ਕਿਹਾ ਕਿ ਉਹ ਪਹਿਲੀ ਵਾਰ ਸ਼ਿਵ ਬਟਾਲਵੀ ਦੇ ਸ਼ਹਿਰ ਬਟਾਲੇ ਆਇਆ ਹੈ ਅਤੇ ਇਥੇ ਪਹੁੰਚ ਕੇ ਉਸਨੂੰ ਦਿਲੀ ਖੁਸ਼ੀ ਮਿਲੀ ਹੈ। ਮਨਿੰਦਰ ਨੇ ਕਿਹਾ ਕਿ ਸ਼ਿਵ ਦੀ ਸ਼ਾਇਰੀ ਦਾ ਕੋਈ ਤੋੜ ਨਹੀਂ ਹੈ ਅਤੇ ਉਸ ਵਰਗਾ ਸ਼ਾਇਰ ਸਦੀਆਂ ਬਾਅਦ ਪੈਦਾ ਹੁੰਦਾ ਹੈ। ਮਨਿੰਦਰ ਨੇ ਪੂਰੇ ਵਿਸ਼ਵ ਵਿੱਚ ਵੱਸਦੇ ਸ਼ਿਵ ਪ੍ਰੇਮੀਆਂ ਨੂੰ ਉਨ੍ਹਾਂ ਦੇ ਜਨਮ ਦਿਨ ਦੀ ਮੁਬਾਰਕਬਾਦ ਦਿੱਤੀ।