ਪਿੰਡ ਦੇਵੀ ਨਗਰ ਵਿਚੋਂ 2500 ਲੀਟਰ ਨਜਾਇਜ਼ ਸਪਿਰਟ ਬਰਾਮਦ-ਗਿਰੀਸ਼ ਦਿਆਲਨ
5 Dariya News
ਐਸ.ਏ.ਐਸ. ਨਗਰ 23-Jul-2020
ਪੰਜਾਬ ਸਰਕਾਰ ਵਲੋਂ ਨਜਾਇਜ ਸ਼ਰਾਬ ਦੇ ਧੰਦੇ ਖਿਲਾਫ ਸਖ਼ਤ ਕਾਰਵਾਈ ਕਰਨ ਦੀਆਂ ਦਿੱਤੀਆਂ ਹਦਾਇਤਾਂ ‘ਤੇ ਅਮਲ ਕਰਦਿਆਂ ਵੀਰਵਾਰ ਦੇਰ ਸ਼ਾਮ ਜ਼ਿਲ੍ਹਾ ਮੋਹਾਲੀ ਦੇ ਡੇਰਾਬੱਸੀ ਇਲਾਕੇ ਦੇ ਪਿੰਡ ਦੇਵੀ ਨਗਰ ਵਿਚੋਂ ਜ਼ਿਲ੍ਹਾ ਪ੍ਰਸ਼ਾਸਨ ਅਤੇ ਆਬਕਾਰੀ ਵਿਭਾਗ ਦੇ ਅਧਿਕਾਰੀਆਂ ਦੀ ਸਾਂਝੀ ਅਗਵਾਈ ਵਿਚ ਪਿੰਡ ਦੇ ਇਕ ਗੁਦਾਮ ਵਿਚੋਂ ਟੀਮ ਵਲੋਂ ਛਾਪਾ ਮਾਰ ਕੇ ਭਾਰੀ ਮਾਤਰਾ ਵਿਚ ਨਜਾਇਜ਼ ਸਪਿਰਟ ਬਰਾਮਦ ਕੀਤੀ ਗਈ। ਇਹ ਜਾਣਕਾਰੀ ਡਿਪਟੀ ਕਮਿਸ਼ਨਰ ਸ੍ਰੀ ਗਿਰੀਸ਼ ਦਿਆਲਨ ਨੇ ਦਿੱਤੀ।ਉਹਨਾਂ ਦੱਸਿਆ ਕਿ ਛਾਪਾ ਮਾਰਨ ਵਾਲੀ ਟੀਮ ਵਿਚ ਸਹਾਇਕ ਕਮਿਸ਼ਨਰ ਆਬਕਾਰੀ ਸ੍ਰੀ ਨਰੇਸ਼ ਦੂਬੇ, ਏਈਟੀਸੀ ਪਰਮਿੰਦਰ ਸਿੰਘ ਧਾਲੀਵਾਲ, ਨਾਇਬ ਤਹਿਸੀਲਦਾਰ ਬਰਿੰਦਰ ਟੂਸ ਸ਼ਾਮਲ ਸਨ ਅਤੇ ਇਹਨਾਂ ਵਲੋਂ ਸੂਹ ਪ੍ਰਾਪਤ ਹੋਣ ਤੇ ਕੀਤੀ ਛਾਪਾਮਾਰੀ ਦੌਰਾਨ 2500 ਲੀਟਰ ਨਜਾਇਜ ਸਪਿਰਟ ਬਰਾਮਦ ਕੀਤੀ ਗਈ। ਗੁਦਾਮ ਦੇ ਮਾਲਕ ਕੋਲ ਇਸ ਸਬੰਧੀ ਕੋਈ ਪਰਮਿਟ ਜਾਂ ਲਾਇਸੰਸ ਮੌਜੂਦ ਨਹੀਂ ਸੀ।ਖਬਰ ਸਾਂਝੀ ਕਰਨ ਦੇ ਸਮੇਂ ਤੱਕ 2500 ਲੀਟਰ ਬਰਾਮਦ ਕੀਤੀ ਗਈ ਸੀ ਅਤੇ ਤਫਤੀਸ਼ ਜਾਰੀ ਸੀ। ਆਬਕਾਰੀ ਅਧਿਆਕੀਆਂ ਅਨੁਸਾਰ ਗੁਦਾਮ ਦੇ ਮਾਲਕਾਂ ਪਾਸੋਂ ਹੋਰ ਵੀ ਨਜਾਇਜ ਸਪਿਰਟ ਪ੍ਰਾਪਤ ਹੋਣ ਦੀ ਸੰਭਾਵਨਾ ਹੈ। ਉਹਨਾਂ ਦੱਸਿਆ ਕਿ ਤਫਤੀਸ਼ ਉਪਰੰਤ ਮੁਲਜ਼ਮ ਵਿਰੁੱਧ ਆਬਕਾਰੀ ਐਕਟ ਦੀਆਂ ਬਣਦੀਆਂ ਧਾਰਾਵਾਂ ਹੇਠ ਕੇਸ ਦਰਜ ਕੀਤਾ ਜਾਵੇਗਾ।