ਡਿਪਟੀ ਕਮਿਸ਼ਨਰ ਘਨਸ਼ਿਆਮ ਥੋਰੀ ਦੇ ਦਿਸ਼ਾ ਨਿਰਦੇਸ਼ਾਂ ਹੇਠ ਵੱਧ ਤੋਂ ਵੱਧ ਲੋੜਵੰਦਾਂ ਤੱਕ ਮਿਆਰੀ ਸਿਹਤ ਸੁਵਿਧਾਵਾਂ ਮੁਹੱਈਆ ਕਰਵਾਉਣ ਲਈ ਜ਼ਿਲ੍ਹਾ ਰੈਡ ਕਰਾਸ ਸੁਸਾਇਟੀ ਵੱਲੋਂ ਇੰਡੀਅਨ ਮੈਡੀਕਲ ਐਸੋਸੀਏਸ਼ਨ ਦੀ ਸੰਗਰੂਰ ਸ਼ਾਖਾ ਦੇ ਸਹਿਯੋਗ ਨਾਲ ਅੱਜ ਤੀਜਾ ਸੰਜੀਵਨੀ ਮੁਫ਼ਤ ਮੈਡੀਕਲ ਕੈਂਪ ਹਰੀਪੁਰਾ ਬਸਤੀ ਵਿਖੇ ਲਗਾਇਆ ਗਿਆ ਜਿਸ ਦੇ ਨੋਡਲ ਅਧਿਕਾਰੀ ਕਾਰਜਕਾਰੀ ਮੈਜਿਸਟਰੇਟ ਪਵਿੱਤਰ ਸਿੰਘ ਸਨ। ਇਸ ਕੈਂਪ ਦੌਰਾਨ ਤਿੰਨ ਸੌ ਤੋਂ ਵਧੇਰੇ ਮਰੀਜ਼ਾਂ ਨੇ ਮੁਫ਼ਤ ਵਿੱਚ ਡਾਕਟਰੀ ਸੇਵਾਵਾਂ ਦਾ ਲਾਭ ਹਾਸਲ ਕੀਤਾ ਅਤੇ ਮੌਕੇ 'ਤੇ ਹੀ ਮੁਫ਼ਤ ਦਵਾਈਆਂ ਵੀ ਪ੍ਰਾਪਤ ਕੀਤੀਆਂ। ਸੰਗਰੂਰ ਸਬ-ਡਵੀਜ਼ਨ ਦੇ ਇਸ ਕੈਂਪ ਵਿੱਚ ਡਿਪਟੀ ਕਮਿਸ਼ਨਰ ਦੀ ਤਰਫੋ ਕਾਰਜਕਾਰੀ ਮੈਜਿਸਟਰੇਟ ਪਵਿੱਤਰ ਸਿੰਘ ਨੇ ਕੈਂਪ ਦਾ ਜਾਇਜ਼ਾ ਲਿਆ ਅਤੇ ਡਾਕਟਰਾਂ ਤੇ ਮਰੀਜ਼ਾਂ ਨਾਲ ਗੱਲਬਾਤ ਵੀ ਕੀਤੀ। ਇਸ ਮੌਕੇ ਸਿਹਤ ਵਿਭਾਗ ਦੀ ਤਰਫੋਂ ਮੋਬਾਇਲ ਮੈਡੀਕਲ ਬੱਸ ਦੇ ਰਾਹੀਂ ਲੋੜਵੰਦਾਂ ਦੇ ਵੱਖ ਵੱਖ ਲੋੜੀਂਦੇ ਟੈਸਟ ਵੀ ਮੌਕੇ 'ਤੇ ਹੀ ਕੀਤੇ ਗਏ।ਕਾਰਜਕਾਰੀ ਮੈਜਿਸਟਰੇਟ ਨੇ ਕਿਹਾ ਕਿ ਰੈਡ ਕਰਾਸ ਸੁਸਾਇਟੀ ਦੇ ਉਪਰਾਲਿਆ ਸਦਕਾ ਇਹ ਕੈਂਪ ਸਬ ਡਵੀਜ਼ਨਾਂ ਵਿੱਚ ਲਗਾਤਾਰ ਜਾਰੀ ਰੱਖੇ ਜਾਣਗੇ ਅਤੇ ਵੱਧ ਤੋਂ ਵੱਧ ਲੋੜਵੰਦਾਂ ਲਈ ਇਹ ਕੈਂਪ ਵਰਦਾਨ ਸਾਬਤ ਹੋਣਗੇ। ਉਨ੍ਹਾਂ ਕਿਹਾ ਕਿ ਸ਼ਹਿਰ ਦੇ ਵੱਖ ਵੱਖ ਵਾਰਡਾਂ ਦੇ ਲੋਕਾਂ ਨੂੰ ਇਨ੍ਹਾਂ ਕੈਂਪਾ ਦੇ ਦਾਇਰੇ ਹੇਠ ਲਿਆਉਣ ਲਈ ਲਗਾਤਾਰ ਯਤਨ ਜਾਰੀ ਰੱਖੇ ਜਾਂਦੇ ਹਨ ਅਤੇ ਵੱਖ-ਵੱਖ ਰੋਗਾਂ ਦੇ ਨਾਮੀ ਮਾਹਿਰਾਂ ਨੂੰ ਇਨ੍ਹਾਂ ਕੈਂਪਾਂ ਨਾਲ ਜੁੜਨ ਲਈ ਪ੍ਰੇਰਿਤ ਕੀਤਾ ਜਾਂਦਾ ਹੈ। ਉਨ੍ਹਾਂ ਦੱਸਿਆ ਕਿ ਇਸ ਕੈਂਪ ਵਿੱਚ ਹੋਮਿਊਪੈਥਿਕ ਮਾਹਿਰ ਡਾ. ਏ.ਐਸ ਮਾਨ, ਡਾ. ਜੇ.ਐਸ ਸੋਮਲ, ਡਾ. ਰਵਿੰਦਰ ਸਿੰਘ, ਡਾ ਕਮਲ ਮਾਨ,ਈ.ਐਨ.ਟੀ ਮਾਹਿਰ ਡਾ. ਪ੍ਰਭਾਤ, ਡਾ. ਵਿਕਾਸ ਧੀਰ ਐਮ.ਡੀ ਮੈਡੀਸਨ, ਡਾ. ਵਿਨੋਦ ਕੁਮਾਰ ਐਮ.ਐਸ ਸਰਜਨ, ਡਾ. ਜੂਹੀ ਗੋਇਲ ਐਮ.ਡੀ ਗਾਇਨੀਕੋਲੋਜਿਸਟ, ਡਾ. ਦੀਪਿੰਦਰ ਪੁਨੀਆ ਐਮ.ਡੀ, ਅੱਖ ਰੋਗਾਂ ਦੇ ਮਾਹਿਰ, ਡਾ. ਅਰਪਿੰਦਰ ਕੌਰ ਅਤੇ ਡਾ. ਰਜਨੀ ਆਯੁਰਵੈਦਿਕ ਡਾਕਟਰਾਂ ਵੱਲੋਂ ਗਰੀਬ ਤੇ ਲੋੜਵੰਦਾਂ ਦੀ ਮੁਫ਼ਤ ਜਾਂਚ ਕੀਤੀ ਗਈ ਅਤੇ ਰੈਡ ਕਰਾਸ ਦੀ ਤਰਫੋਂ ਮੁਫ਼ਤ ਦਵਾਈਆਂ ਵੀ ਪ੍ਰਦਾਨ ਕੀਤੀਆਂ ਗਈਆਂ।