ਯੂਵਕ ਸੇਵਾਵਾਂ ਵਿਭਾਗ ਪੰਜਾਬ ਵਲੋਂ ਖੇਡਾਂ ਤੇ ਯੁਵਕ ਸੇਵਾਵਾਂ ਮੰਤਰੀ ਪੰਜਾਬ ਮਾਨਯੋਗ ਰਾਣਾ ਗੁਰਮੀਤ ਸਿੰਘ ਸੋਢੀ ਦੀ ਸਰਪ੍ਰਸਤੀ ਹੇਠ ਨੌਜਵਾਨ ਲੜਕੇ, ਲੜਕੀਆਂ ਨੂੰ ਪਹਾੜੀ ਇਲਾਕਿਆਂ ਮੁਤਾਬਿਕ ਮਾਨਸਿਕ ਅਤੇ ਜਿਸਮਾਨੀ ਤੌਰ ਤੇ ਤਿਆਰ ਕਰਨ ਲਈ ਹਿਮਾਚਲ ਪ੍ਰਦੇਸ਼ ਵਿਚ ਲਗਾਏ ਜਾ ਰਹੇ 10 ਦਿਨਾਂ ਹਾਈਕਿੰਗ ਟਰੈਕਿੰਗ ਕੈਂਪ ਵਿਚ ਜ਼ਿਲ੍ਹਾ ਬਠਿੰਡਾ ਦੀਆਂ 7 ਵਿਦਿਆਰਥਣਾਂ ਨੇ ਭਾਗ ਲਿਆ। ਜਿਨ੍ਹਾਂ ਵਿਚੋਂ ਰਮਨਦੀਪ ਕੌਰ ਪਿੰਡ ਕੋਟਫੱਤਾ, ਸੁਖਦੀਪ ਕੌਰ-ਚੱਠੇਵਾਲਾ, ਵੀਰਪਾਲ ਕੌਰ, ਨਵਜੋਤ ਕੌਰ- ਚਾਉਕੇ, ਰਾਜਪਾਲ ਕੌਰ ਖੋਖਰ, ਕਮਲਦੀਪ ਕੌਰ ਅਤੇ ਜਸਵੀਰ ਕੌਰ ਪਿੰਡ ਯਾਤਰੀ ਵਲੋਂ ਵੱਖ-ਵੱਖ ਮੁਕਾਬਲਿਆਂ 'ਚ ਹਿੱਸਾ ਲਿਆ ਗਿਆ। ਉਨ੍ਹਾਂ ਦੱਸਿਆ ਕਿ ਪੰਜਾਬ ਭਰ ਵਿਚੋਂ 157 ਨੌਜਵਾਨ ਲੜਕੀਆਂ ਨੇ ਚੰਦਰਖਾਨੀਪਾਸ ਜਿਸ ਦੀ ਉਚਾਈ 3600 ਮੀਟਰ ਹੈ, ਨੂੰ ਪਾਰ ਕਰਨ ਲਈ ਟਰੈਕਿੰਗ ਕੀਤੀ । ਜ਼ਿਲ੍ਹੇ ਦੀਆਂ ਲੜਕੀਆਂ ਵਲੋਂ ਸਭ ਤੋਂ ਪਹਿਲਾਂ ਚੋਟੀ ਪਾਰ ਕਰਦਿਆਂ ਹੋਰ ਸਾਥੀ ਟ੍ਰੈਕਰਜ ਨੂੰ ਵੀ ਇਸ ਨੂੰ ਪਾਰ ਕਰਨ ਵਿਚ ਸਹਾਇਤਾ ਕੀਤੀ। ਉਨ੍ਹਾਂ ਦੱਸਿਆ ਕਿ ਇਹ ਬਠਿੰਡਾ ਜ਼ਿਲ੍ਹੇ ਦੀਆਂ ਪਹਿਲੀਆਂ ਕੁੜੀਆਂ ਹਨ ਜਿਨ੍ਹਾਂ ਨੇ ਇਸ ਦਰ੍ਹੇ ਨੂੰ ਪਾਰ ਕਰਨ ਦਾ ਸਾਹਸ ਦਿਖਾਇਆ। ਰਸਤੇ 'ਚ ਸੇਬ, ਅਖਰੋਟ ਅਤੇ ਜਪਾਨੀ ਫਲਾਂ ਦੇ ਬਾਗਾਂ 'ਚੋਂ ਗੁਜਰਦਿਆਂ ਇਨ੍ਹਾਂ ਵਿਦਿਆਰਥਣਾਂ ਨੇ ਪੂਰੇ ਅਨੁਸ਼ਾਸਨ ਅਤੇ ਜਿੰਮੇਵਾਰੀ ਨਾਲ ਦਸ ਰੋਜ਼ਾ ਕੈਂਪ ਦੀ ਹਰ ਡਿਉਟੀ ਨੂੰ ਤਨਦੇਹੀ ਨਾਲ ਨਿਭਾਇਆ।
ਖੇਡਾਂ ਦੇ ਸ਼ੈਸਨ ਵਿਚ ਰੱਸਾਕਸੀ ਅਤੇ ਰੁਮਾਲ ਚੁੱਕ ਦੇ ਜ਼ਿਲ੍ਹੇ ਵਾਰ ਮੁਕਾਬਲਿਆਂ 'ਚ ਮੋਹਰੀ ਸਥਾਨ ਹਾਸਲ ਕੀਤਾ। ਟਰੈਕਿੰਗ ਦੌਰਾਨ ਭਾਰੀ ਮੀਂਹ ਅਤੇ ਸਿੱਧੀ ਚੜ੍ਹਾਈ ਦੀ ਚੁਣੋਤੀ ਨੂੰ ਪਾਰ ਕਰਨ ਲਈ ਇਨ੍ਹਾਂ ਵਿਦਿਆਰਥਣਾਂ ਵਲੋਂ ਰਸਤੇ ਵਿਚ ਦੋ ਥਾਵਾਂ ਤੇ ਟੈਂਟ ਲਗਾਕੇ ਇਸ ਨੂੰ ਸਰ ਕੀਤਾ ਅਤੇ ਮੁਸਕਿਲ ਹਾਲਾਤਾਂ ਦਾ ਸਾਹਮਣਾ ਕਰਨ ਦੇ ਯੋਗ ਬਣਾਇਆ। ਇਨ੍ਹਾਂ ਵਿਦਿਆਰਥਣਾਂ ਨੇ ਭਵਿੱਖ ਵਿਚ ਵੀ ਇਸ ਕੈਂਪ ਤੋਂ ਪ੍ਰੇਰਤ ਹੋ ਕੇ ਟਰੈਕਿੰਗ ਰਾਹੀਂ ਮਿਹਾਚਲ ਪ੍ਰਦੇਸ਼ ਦੇ ਹੋਰ ਦਰ੍ਹੇ ਅਤੇ ਸਾਹਸਕ ਗਤੀ-ਵਿੱਧੀਆਂ ਵਿਚ ਅੱਗੇ ਤੋਂ ਵੱਧ ਚੜ੍ਹਕੇ ਭਾਗ ਲੈਣ ਦਾ ਪ੍ਰਣ ਕੀਤਾ। ਕੈਂਪ ਤੋਂ ਸਫ਼ਲਤਾ ਪੂਰਵਕ ਵਾਪਸ ਪਰਤਨ 'ਤੇ ਐਸ.ਐਸ.ਪੀ. ਬਠਿੰਡਾ ਡਾ. ਨਾਨਕ ਸਿੰਘ ਵਲੋਂ ਇਨ੍ਹਾਂ ਨੂੰ ਵਿਸ਼ੇਸ਼ ਤੌਰ ਤੇ ਸਨਮਾਨਿਤ ਕੀਤਾ ਗਿਆ ਅਤੇ ਸਮਾਜਿਕ ਖੇਤਰ 'ਚ ਵੱਧ ਚੜ੍ਹਕੇ ਹਿੱਸਾ ਲੈਣ ਲਈ ਪ੍ਰੇਰਿਤ ਕੀਤਾ। ਇਸ ਮੌਕੇ ਸਹਾਇਕ ਡਾਇਰੈਕਟਰ, ਯੂਵਕ ਸੇਵਾਵਾਂ, ਬਠਿੰਡਾ ਸ਼੍ਰੀ ਕੁਲਵਿੰਦਰ ਸਿੰਘ ਨੇ ਨੌਜਵਾਨਾਂ ਨੂੰ ਉਨ੍ਹਾਂ ਦੀਆਂ ਪ੍ਰਾਪਤੀਆਂ ਲਈ ਵਧਾਈ ਦਿੰਦਿਆਂ ਕਿਹਾ ਕਿ ਵਿਭਾਗ ਵਲੋਂ ਜ਼ਿਲ੍ਹੇ ਦੇ ਨੌਜਵਾਨ ਲੜਕੇ, ਲੜਕੀਆਂ ਨੂੰ ਪਹਾੜੀ ਇਲਾਕਿਆਂ ਵਿਚ ਰਹਿਣ ਵਾਲੇ ਲੋਕਾਂ ਦੀ ਜੀਵਨ ਪ੍ਰਣਾਲੀ ਬਾਰੇ ਜਾਣੂ ਕਰਵਾਉਂਣਾ ਆਤਮ ਵਿਸ਼ਵਾਸ਼, ਸਾਹਸੀ ਰੁਚੀਆਂ ਕੁਦਰਤੀ ਰੂਪ ਵਿਚ ਆਈ ਮੁਸਕਿਲਾਂ ਪ੍ਰਸਿਥਤੀਆਂ ਦਾ ਸਾਹਮਣਾ ਕਰਨ ਅਤੇ ਘੱਟੋ ਘੱਟ ਸਾਧਨਾਂ ਨਾਲ ਵੱਧ ਤੋਂ ਵੱਧ ਪ੍ਰਸੰਨਤਾ ਹਾਸਿਲ ਕਰਨ ਲਈ ਇਨ੍ਹਾਂ ਗਤੀਵਿਧੀਆਂ ਦਾ ਆਯੋਜਿਨ ਕੀਤਾ ਜਾਂਦਾ ਹੈ।