ਜ਼ਿਲ੍ਹਾ ਪੁਲਿਸ ਫ਼ਿਰੋਜ਼ਪੁਰ ਨੂੰ ਉਸ ਸਮੇਂ ਭਾਰੀ ਸਫਲਤਾ ਮਿਲੀ ਜਦੋਂ ਥਾਣਾ ਕੈਂਟ ਫ਼ਿਰੋਜ਼ਪੁਰ ਦੇ ਮੁੱਖ ਅਫ਼ਸਰ ਐੱਸ.ਆਈ ਨਵੀਨ ਕੁਮਾਰ ਅਤੇ ਇੰਚਾਰਜ ਸੀ.ਆਈ.ਏ ਹੈੱਡਕੁਆਟਰ ਇੰਸਪੈਕਟਰ ਅਵਤਾਰ ਸਿੰਘ ਰਾਜਪਾਲ ਦੀ ਟੀਮ ਵੱਲੋਂ ਟੈਕਨੀਕਲ ਤਰੀਕੇ ਨਾਲ ਤਫ਼ਤੀਸ਼ ਕਰਕੇ ਅਮਰ ਸਿੰਘ ਪੁੱਤਰ ਕਿਰਪਾਲ ਸਿੰਘ ਵਾਸੀ 148-ਪੀ, ਸੰਤਲਾਲ ਰੋਡ ਫ਼ਿਰੋਜ਼ਪੁਰ ਛਾਉਣੀ ਦੇ ਕਤਲ ਦੇ ਦੋਸ਼ੀ ਦੀ ਪਛਾਣ ਕਰਕੇ ਮਿਤੀ 9 ਜਨਵਰੀ 2018 ਨੂੰ ਦੋਸ਼ੀ ਨੂੰ 16 ਘੰਟਿਆਂ ਵਿੱਚ ਗ੍ਰਿਫ਼ਤਾਰ ਕਰਕੇ ਉਸ ਦੇ ਕਬਜ਼ੇ ਵਿਚੋਂ ਵਾਰਦਾਤ ਸਮੇਂ ਵਰਤੀ ਗਈ ਕਿਰਚ ਵੀ ਬਰਾਮਦ ਕਰ ਲਈ ਗਈ। ਇਸ ਤੋਂ ਇਲਾਵਾ ਜ਼ੀਰਾ ਵਿਖੇ ਹੋਏ ਕਤਲ ਦੇ ਸਬੰਧ ਵਿੱਚ ਵੀ ਪੁਲਿਸ ਨੇ ਕਥਿਤ ਕਾਤਲ ਨੂੰ ਗ੍ਰਿਫ਼ਤਾਰ ਕਰਨ ਵਿੱਚ ਸਫਲਤਾ ਹਾਸਲ ਕੀਤੀ ਹੈ।ਸ੍ਰ: ਭੁਪਿੰਦਰ ਸਿੰਘ ਪੀ.ਪੀ.ਐੱਸ ਸੀਨੀਅਰ ਕਪਤਾਨ ਪੁਲਿਸ ਫ਼ਿਰੋਜ਼ਪੁਰ ਨੇ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਮਿਤੀ 8 ਜਨਵਰੀ 2018 ਦੀ ਰਾਤ ਨੂੰ ਵਕਤ ਕਰੀਬ 10.30 ਵਜੇ ਅਮਰ ਸਿੰਘ ਪੁੱਤਰ ਕਿਰਪਾਲ ਸਿੰਘ ਵਾਸੀ 148-ਪੀ, ਸੰਤਲਾਲ ਰੋਡ ਫ਼ਿਰੋਜ਼ਪੁਰ ਛਾਉਣੀ ਦੇ ਘਰ ਵਿਚ ਕੋਈ ਅਣਪਛਾਤਾ ਵਿਅਕਤੀ ਕੰਧ ਟੱਪ ਕੇ ਦਾਖਲ ਹੋਇਆ ਜਿਸ ਤੇ ਅਮਰ ਸਿੰਘ ਵੱਲੋਂ ਖੜਕਾ ਸੁਣ ਕੇ ਆਪਣੇ ਘਰ ਦੇ ਕਮਰੇ ਵਿਚੋਂ ਬਾਹਰ ਨਿਕਲ ਕੇ ਬਾਹਰ ਵਿਹੜੇ ਵਿੱਚ ਆਇਆ ਜਦ ਉਸ ਨੇ ਅਣਪਛਾਤੇ ਵਿਅਕਤੀ ਨੂੰ ਫੜਨ ਦੀ ਕੋਸ਼ਿਸ਼ ਕੀਤੀ ਤਾਂ ਅਣਪਛਾਤੇ ਵਿਅਕਤੀ ਵੱਲੋਂ ਅਮਰ ਸਿੰਘ ਨਾਲ ਹੱਥੋਪਾਈ ਹੋਣ ਤੇ ਉਕਤ ਵਿਅਕਤੀ ਨੇ ਆਪਣੇ ਹੱਥ ਵਿੱਚ ਫੜੀ ਕਿਰਚ ਨਾਲ ਅਮਰ ਸਿੰਘ ਦੇ ਪੇਟ ਅਤੇ ਛਾਤੀ ਵਿਚ ਕਈ ਵਾਰ ਕਰ ਦਿੱਤੇ ਜਿਸ ਤੇ ਰੋਲਾ ਸੁਣ ਕੇ ਅਮਰ ਸਿੰਘ ਦੀ ਪਤਨੀ ਚਰਨਜੀਤ ਕੌਰ ਬਾਹਰ ਨਿਕਲੀ ਜਿਸ ਨੇ ਵੀ ਉਕਤ ਵਿਅਕਤੀ ਨੂੰ ਫੜਨ ਦੀ ਕੋਸ਼ਿਸ਼ ਕੀਤੀ ਤਾਂ ਉਕਤ ਵਿਅਕਤੀ ਨੇ ਚਰਨਜੀਤ ਕੌਰ ਦੇ ਮੂੰਹ, ਗਰਦਨ, ਹੱਥ ਅਤੇ ਹੱਥ ਦੇ ਅੰਗੂਠੇ ਤੇ ਤੇਜ਼ਧਾਰ ਹਥਿਆਰ ਦੇ ਵਾਰ ਕੀਤੇ ਅਤੇ ਦੋਸ਼ੀ ਮੌਕੇ ਤੋਂ ਲੱਕੜ ਦੀ ਪੌੜੀ ਚੜ੍ਹ ਕੇ ਛੱਤ ਰਾਹੀਂ ਭੱਜ ਗਿਆ।
ਉਕਤ ਸੱਟਾਂ ਨਾਲ ਅਮਰ ਸਿੰਘ ਦੀ ਮੌਤ ਹੋ ਗਈ ਸੀ ਅਤੇ ਚਰਨਜੀਤ ਕੌਰ ਨੂੰ ਸਿਵਲ ਹਸਪਤਾਲ ਫ਼ਿਰੋਜਪੁਰ ਦਾਖਲ ਕਰਵਾਇਆ ਗਿਆ ਅਤੇ ਚਰਨਜੀਤ ਕੌਰ ਦੇ ਬਿਆਨ ਤੇ ਅਣਪਛਾਤੇ ਵਿਅਕਤੀ ਦੇ ਖ਼ਿਲਾਫ਼ ਮੁਕੱਦਮਾ ਨੰਬਰ 03 ਮਿਤੀ 9-01-18 ਅ/ਧ 302,324 ਭ:ਦ ਥਾਣਾ ਕੈਂਟ ਫ਼ਿਰੋਜ਼ਪੁਰ ਦਰਜ ਕੀਤਾ ਗਿਆ। ਦੋਸ਼ੀ ਦਾ ਨਾਮ ਰੋਬਿਟ ਉਰਫ਼ ਜੋਨੀ ਪੁੱਤਰ ਮੰਗਲ ਵਾਸੀ ਹਾਤਾ ਨੰਬਰ 131, ਭਗਤ ਸਿੰਘ ਰੋਡ ਵਾਕਰ ਬਿਲਡਿੰਗ ਫ਼ਿਰੋਜ਼ਪੁਰ ਛਾਉਣੀ ਹੈ, ਜਿਸ ਨੂੰ ਗ੍ਰਿਫ਼ਤਾਰ ਕਰਕੇ ਅਦਾਲਤ ਪੇਸ਼ ਕੀਤਾ ਗਿਆ ਹੈ ।ਇਸ ਤੋਂ ਇਲਾਵਾ ਉਨ੍ਹਾਂ ਦੱਸਿਆ ਕਿ ਮਿਤੀ 27 ਦਸੰਬਰ 2017 ਨੂੰ ਬਲਦੇਵ ਸਿੰਘ ਵਾਸੀ ਵਾਰਡ ਨੰ 12 ਮੱਲਾਂਵਾਲਾ ਰੋਡ ਜ਼ੀਰਾ ਨੇ ਸ:ਥ ਦਵਿੰਦਰ ਕੁਮਾਰ ਪਾਸ ਆਪਣਾ ਬਿਆਨ ਲਿਖਵਾਇਆ ਕਿ ਉਨ੍ਹਾਂ ਦੇ ਘਰ ਅਣਪਛਾਤੇ ਵਿਅਕਤੀਆਂ ਵੱਲੋਂ ਅਣਅਧਿਕਾਰ ਦਾਖਲ ਹੋ ਕੇ ਉਸ ਦੀ ਮਾਤਾ ਛਿੰਦਰ ਕੌਰ ਉਮਰ 85 ਸਾਲ ਦੇ ਸੱਟਾਂ ਮਾਰੀਆਂ ਹਨ ਜਿਸ ਦੀ ਸ:ਥ ਦਵਿੰਦਰ ਕੁਮਾਰ ਵੱਲੋਂ ਮੁਕੱਦਮਾ ਨੰਬਰ 287 ਅ/ਧ 452, 323 ਭ:ਦ ਥਾਣਾ ਸਦਰ ਜ਼ੀਰਾ ਦਰਜ ਹੋਇਆ। ਮਿਤੀ 28 ਦਸੰਬਰ 2017 ਨੂੰ ਮਜਰੂਬ ਛਿੰਦਰ ਕੌਰ ਦੀ ਮੌਤ ਹੋ ਗਈ ਅਤੇ ਮੁਕੱਦਮਾ ਵਿਚ ਜੁਰਮ 302 ਭ:ਦ ਦਾ ਵਾਧਾ ਕੀਤਾ ਗਿਆ। ਜੇਰੇ ਨਿਗਰਾਨੀ ਸ਼੍ਰੀ ਜਸਪਾਲ ਸਿੰਘ ਢਿੱਲੋਂ ਡੀ.ਐੱਸ.ਪੀ ਜ਼ੀਰਾ ਅਤੇ ਇੰਸ. ਅਵਤਾਰ ਸਿੰਘ ਰਾਜਪਾਲ ਇੰਚਾਰਜ ਸੀ.ਆਈ.ਏ ਹੈੱਡਕੁਆਟਰ ਅਤੇ ਸ.ਥ ਦਵਿੰਦਰ ਕੁਮਾਰ ਵੱਲੋਂ ਮੁਕੱਦਮਾ ਦੀ ਬਾਰੀਕੀ ਨਾਲ ਤਫ਼ਤੀਸ਼ ਕਰਨ ਤੇ ਦੋਸ਼ੀ ਛਿੰਦਰ ਸਿੰਘ ਪੁੱਤਰ ਦੇਵ ਸਿੰਘ ਵਾਸੀ ਪਿੰਡ ਚੋਲਾ ਜੋ ਕਿ ਇਨ੍ਹਾਂ ਦਾ ਸੀਰੀ ਸੀ ਨੂੰ ਮਿਤੀ 10 ਜਨਵਰੀ 2018 ਨੂੰ ਗ੍ਰਿਫ਼ਤਾਰ ਕਰਕੇ ਕਤਲ ਸਮੇਂ ਵਰਤਿਆ ਹਥਿਆਰ ਬਰਾਮਦ ਕੀਤਾ ਜਾ ਚੁੱਕਾ ਹੈ ਅਤੇ ਦੋਸ਼ੀਆਂ ਪਾਸੋਂ ਪੁੱਛਗਿੱਛ ਜਾਰੀ ਹੈ।